Premer-Mınıstr Asqar Mamınniń tóraǵalyǵymen ótken Úkimettiń selektorlyq otyrysynda eldi mekenderdi keńjolaqty ınternetke qoljetimdilikpen qamtamasyz etý máselesi qaraldy.
Bul baǵyttaǵy atqarylyp jatqan jumystar týraly Sıfrlyq damý, ınnovasııalar jáne aeroǵarysh ónerkásibi mınıstri A. Jumaǵalıev, «Qazaqtelekom» AQ basqarma tóraǵasy K. Esekeev, «Transtelekom» AQ basqarma tóraǵasy J. Nadyrov, «Kar-Tel» JShS atqarýshy dırektory E. Nastradın, sondaı-aq Aqmola oblysynyń ákimi E. Marjyqpaev pen Soltústik Qazaqstan oblysynyń ákimi Q. Aqsaqalov baıandady.
Qazaqstanda ınternetti belsendi paıdalanýshylar qatary artyp keledi. Sondyqtan «Sıfrlyq Qazaqstan» memlekettik baǵdarlamasyn iske asyrý aıasynda jelini paıdalanýshylardyń úlesi 88%-ǵa deıin, al sıfrlyq saýattylyq deńgeıi 83%-ǵa jetedi. Bul mindetterdi osy jyldyń sońyna deıin júzege asyrý 5163 aýyldyq eldi mekendi keńjolaqty ınternetpen qamtamasyz etýge múmkindik beredi. Nátıjesinde aýyldarda 7,6 mln astam adam onlaın bilim alýǵa, telemedısınaǵa, memlekettik qyzmetterge, elektrondyq saýdaǵa qol jetkizedi.
«Tótenshe jaǵdaı kezinde ınternetpen turaqty túrde qamtamasyz etý máselesi Memleket basshysynyń erekshe baqylaýynda. Qazirgi jaǵdaıda ınternet halyqtyń negizgi baılanys arnasyna aınaldy, ol sondaı-aq elektrondyq saýda, onlaın-oqý, elektrondyq memlekettik qyzmetter, densaýlyq saqtaý júıesi, qarjy jáne ekonomıkanyń basqa da salalarynda mańyzdy qural bolyp otyr», - dedi A. Mamın.
Úkimet basshysy Sıfrlyq damý, ınnovasııalar jáne aeroǵarysh ónerkásibi mınıstrligine baılanys operatorlarymen birlesip josparlanǵan eldi mekenderdi ınternetpen qamtamasyz etý jobalaryn ýaqtyly iske asyrý boıynsha barlyq qajetti sharalardy qabyldaýdy tapsyrdy.
Ákimdikterge antennalyq - machtalyq qurylystar salýǵa jáne baılanys jelisin tartýǵa jer bólý, elektr energııasymen qamtamasyz etý máselelerin jedel sheshý tapsyryldy.