Bul týraly Bilim jáne ǵylym mınıstri Ashat Aımaǵambetov vedomstvonyń onlaın rejimde ótip jatqan apparattyq keńesinde aıtty.
– Birinshiden, bıylǵy qyrkúıekke deıin vıdeosabaqtardy IV toqsannyń baǵdarlamasy boıynsha ǵana emes, barlyq toqsandaǵy taqyryptarǵa da túsirýimiz kerek. Ekinshiden, vıdeosabaqtardyń sapasy men kontentine kóńil bólýimiz qajet. Árıne syn saǵatta shuǵyl sheshimmen jyldam túsirýdi kózdedik, endi aldaǵy ýaqytta vıdeosabaqtarǵa tıisti mýltımedııalardy qosyp, joǵary sapada daıyndaýǵa tıispiz. Úshinshiden, vıdeosabaqtardyń uzaqtyǵyn pánge, synyp ereksheligine sáıkes qaıta qaraý kerek. Bireýine 10 mınýt jetkilikti bolsa, basqasyna múmkin 20 mınýt qajet shyǵar. Sondyqtan osy turǵydan qarap, tıisti zertteý júrgizip, bir tujyrymdamaǵa kelgenimiz durys, – dedi mınıstr.