Veloshabandozdar arasyndaǵy «Almaty týry» dodasy bıylǵy jyly ótpeıtin boldy. Bul jaıynda Astana Pro Team klýbynyń bas menedjeri Aleksandr Vınokýrov Olympic.kz saıtyna bergen suhbatynda málimdedi.
Árıne, koronavırýs derti ýshyǵyp turǵan kezde sporttyq jarystardyń sanyn barynsha shektegen jón. Sol sebepti de barsha jurt Almaty qalasy ákimshiliginiń bul sheshimin qoldap otyr. Onyń ústine, sheteldikterdiń de Qazaqstanǵa kele almaıtyny anyq. Al eger sańlaq sportshylar óner kórsetpeıtin bolsa, onda bul básekeniń qyzyǵy da kemıtini anyq. Desek te Alataý baýyraıynda jyl saıyn jalaýy jelbireıtin jarysqa bıyl kásipqoılar qatyspaǵanymen, áýesqoılar arasynda saıys uıymdastyrý jaǵy qarastyrylyp jatqan kórinedi.
Esterińizge sala keteıik, «Almaty týrynyń» tusaýy 2013 jyly kesilgen bolatyn. Alǵashqy dodada Maksım Iglınskıı daralansa, odan keıin Alekseı Lýsenko qatarynan tórt ret bas júldeni oljalady. 2018 jyly ıtalııalyq Davıde Vıllella top jarsa, byltyrǵy jarys Iýrıı Natarovtyń jeńisimen aıaqtaldy.