Keshe, ıaǵnı 27 sáýir kúni Qazaqstan Respýblıkasynyń Prezıdenti Qasym-Jomart Toqaev koronavırýs indetine baılanysty Úndeý jarııalaǵan bolatyn. Memleket basshysynyń Úndeýinde aıtylǵan mindetterdi júzege asyrý maqsatynda Jambyl oblysynyń ákimi Berdibek Saparbaevtyń tóraǵalyǵymen óńirlik jedel shtabtyń kezekti otyrysy ótti.
Búgingi tańda oblysta koronavırýstyń 100-den astam jaǵdaıy tirkelgen bolsa, onyń 43-i emdelip shyqqan. Mundaǵy negizgi mindet – naýqastardyń sanyn kóbeıtip almas úshin qatań baqylaýdy bosańsytpaý ekeni de aıtyldy.
Basqosýda oblystyq jedel shtabtyń tóraǵasy, oblys ákimi Berdibek Saparbaev áýeli medısına jáne polısııa qyzmetkerleri ótýi tıis COVID-19 boıynsha testterdiń sanyn arttyrý kerektigin atap ótti. Osy ýaqytqa deıin 261 myńnan astam jambyldyq jalpy somasy 11,5 mıllıard teńge bolatyn 42 500 teńge kólemindegi áleýmettik tólemge qol jetkizgen. Al, 77 myń adam 440 mıllıon teńgege azyq-túlik jıyntyǵyn alǵan. Sonymen qatar, «Biz birgemiz!» aksııasy aıasynda 834 mıllıon teńge jınalyp, oǵan 17myńnan astam adam qamtylǵan bolsa, 2 myń dárigerler men polısııa qyzmetkerlerine 210 mıllıon teńgege ústemaqy men syıaqylar tólengen. «Jumysyn bastaıtyn shaǵyn jáne orta kásiporyndardyń tizimin jasaý kerek. Olarǵa jumysyn qaıta bastaý úshin ruqsat tek qaýipsizdik tehnıkasy men sanıtarlyq talaptardy saqtaı alatyndyǵyn dáleldeı alǵanda ǵana beriledi. Olardyń saqtalýyn baqylaý aýdan ákimderine júkteledi», dedi Berdibek Saparbaev. Sondaı-aq, kúnine keminde eki ret dezınfeksııalaý jáne qorǵanys kostıýmderi men betperdeleriniń bolýy basty nazarǵa alynady. Usynylǵan shaǵyn jáne orta kásiporyndar tiziminen shashtarazdar men sulýlyq salondaryn alyp tastaý týraly sheshim qabyldandy. Sebebi, onda adamdardyń jıi baılanysta bolýy múmkin jáne sanıtarlyq talaptardyń oryndalýy qıyn. Alaıda, qyzmet kórsetý stansııalary, avtojýý, azyq-túlik emes dúkender jáne basqa da nysandar óz jumysyn bastaıdy. Al, meıramhanalar men kafeler áli de jetkizip berý rejıminde qyzmet ete beredi.
Jıynda jaǵdaıy tómen, kópbalaly otbasylardyń bireýi qamqorlyqsyz qalmas úshin belsendi demeýshilerdi tartýdy jalǵastyra berý qajettigi de aıtyldy. Bul rette Berdibek Saparbaev «Úılestirý keńsesindegi jáne áleýmettik baǵdarlamalardaǵy barlyq tizimderdi tekserińizder. Kómekke muqtaj kez kelgen adam kómek alýy tıis», dep atap ótti. Memleket basshysynyń tapsyrmasyna sáıkes, 42 500 teńge mólsherindegi áleýmettik tólemderdi ekinshi qaıtara tóleý sharalaryn, kommýnaldyq shyǵyndardy óteý úshin 15 myń teńgeni rásimdeýdi utymdy uıymdastyra bilý qajettigi de aıtyldy. Sonymen qatar, Uly Jeńis kúni qarsańynda ardagerler men olarǵa teńestirilgender tıisti tólemderdi qol jetkizedi. Oblystaǵy soǵysqa qatysqan 57 ardagerge 1 mıllıon teńgeden berilip, olardy qala jáne aýdan ákimderi arnaıy baryp quttyqtaıtyn bolady. Sonymen qatar, jıynda tıisti oryndar áleýmettik jelilerde jalǵan aqparattar taratyp, qoǵamda dúrligý týǵyzatyn tulǵalardy anyqtaý jónindegi jumysty jandandyra túsýdiń mańyzdylyǵy da qaraldy. «Memleket basshysy aıtqandaı, 11 mamyrǵa deıin el ekonomıkasyn qalpyna keltirýdiń keshendi jospary túziledi. Osy oraıda Jambyl oblysy da 7 mamyrǵa deıin óz nusqasyn ázirlep, Úkimetke usynýy kerek. Shekteý sharalaryn engizý aımaqtyq ekonomıkaǵa qaı deńgeıde áser etetini, qandaı sharalar kóp zardap shegedi, qaı jerlerde tabystyń tómendeýi, jumyssyzdyq deńgeıi artatyny týraly boljam jasaý qajet. Bastapqy boljamdarǵa sáıkes, bul saýda, kásipkerlik, mádenıet, óner jáne sport salalary. Osyǵan oraı, 30 sáýirge deıin aýmaqtyq jumyspen qamtýdyń jol kartasyn ázirleý qajet. Negizgi maqsat – keminde 26 myń, onyń ishinde 11 myń turaqty jumys ornyn qurý, jumys oryndarynyń jappaı bosaýyna jol bermeý. Eń bastysy – tártipti saqtaý, ár adam óz taǵdyry úshin ǵana emes, sonymen birge jaqyn jáne aınalasyndaǵy adamdardyń taǵdyry úshin de jaýapkershilikti sezinýi tıis», dedi Berdibek Saparbaev.
Jambyl oblysy