Elimizde tótenshe jaǵdaı engizilgenine de bir jarym aıdyń júzi boldy. Eki dúnıe arasyn bir qadam qylǵan qaterli vırýsqa qarsy Qazaqstan Prezıdenti Qasym-Jomart Toqaev qabyldaǵan qatań sharalar qysyltaıań kezeńde nátıjesin berdi.
Álbette, bul kezeń tarıh úshin qas-qaǵym sát bolǵanymen, jurtshylyqqa ońaı tımegendikten jyldar boıy jadydan óshpeıtin, jer-jahandy da, jan dúnıeni de ózgertken, adamzat rýhyn janyǵan ózgeshe ýaqyt bolǵany anyq. Bul kezeń Prezıdent aıtqandaı, tórt qabyrǵaǵa oqshaýlanǵan otbasylarǵa da, qoǵam qajettiligi men qaýipsizdigi úshin kún men tún qatyp qyzmet etken otandastarymyzǵa da ońaı tıgen joq. Dese de «kóppen kórgen uly toı» demekshi, el-jurtymyz bul synaqta da jumyla bildi.
«Aýrý atandy da jyǵady» degen sóz bar. Al bıylǵy indet búkil dúnıeni búk túsirdi. Adamdar tabysynan aıryldy, nápaqasyz qaldy, kásiporyndardyń kóbi kilt toqtady, ekonomıkalar turalady. Qazir jahan jurty pandemııadan keıingi syn-qaterlerge qarsy kúreske de bas qatyryp jatyr. Osylaısha asqynǵan aýrý nasyrǵa shabatynyn anyq kórsetken COVID-19 indetimen kúrestiń sońy uzaqqa sozylatyn syńaıly.
Tótenshe jaǵdaı jarııalanǵan 16 naýryzdan beri Memleket basshysy Qasym-Jomart Toqaev halyqqa bir ret Úndeý, eki márte málimdeme jasasa, Tuńǵysh Prezıdent – Elbasy Nursultan Nazarbaev ta qıyn sátte qoldaý kórsetýge úndegen Úndeýi men «Birlese bilgen el bárin jeńedi» atty maqalasyn jarııalady. Aqyldy basshy aldyrmas degen, tóreli jerge el toqtady. Qasyqtan qaǵylyp, qasiret shegetin azamattar qaı elde de bar. Alaıda osy bir kúrdeli sátte qoǵam bolyp qozǵalyp, qaıyrymdylyqtyń san úlgisi saltanat qurǵanyna kýá boldyq. Memleket ár azamatty nazardan tys qaldyrmaıtynyn dáleldedi. 4,5 mln-ǵa jýyq azamatqa qarjylaı kómek kórsetildi, 500 myńnan astam adamǵa azyq-túlik taratyldy. Azamattardyń nesıeleri shegerildi, orta jáne shaǵyn kásipkerler ýaqytsha salyqtan bosatylyp, jeńildikterge ıe boldy. Sharýa adamdaryna arzandatylǵan dızel otyny men tuqym satyp alýyna, basqa da qajettilikterine qarjy bólindi. Munyń barlyǵy el qazynasyna 6 trln teńgege túsip otyr. Bul – qomaqty qarajat. Kommýnaldyq tólemge de kómek kórsetilýde. Elbasy bastamasymen qurylǵan «Birgemiz» qorynan qarjy bólindi. Nur Otan partııasy barlyq óńirde belsendi jumys júrgizýde. Elimizdiń mańdaıaldy aýqattylarynan bastap arnaıy qorǵa aqshalaryn aýdardy. Odan orta býyndaǵy kásipkerler men qarapaıym azamattar da qalys qalmaı, barymen bólisip, qolynan kelgenshe járdemdesti.
Osylaısha, jınalǵan azyq-túlik qory men alǵashqy qajettilikke enetin áleýmettik turmystyq taýarlar sebeti ár úıge deıin eriktilerdiń kómegimen jetkizilýde. Ásirese, qaterli dertpen betpe-bet kelgen medısına men qashyqtan qyzmet etip jatqan bilim salasynyń qyzmetkerlerine qurmet arta tústi. «Ár istiń qaıyry bar» degendi qazaq osyndaıda aıtsa kerek. Bul indettiń qyspaǵynda da izgiliktiń tolastamaıtynyn, adam adamǵa pana ekenin ańǵartty.
Áste, adam shydaǵanǵa qurysh shydamaıdy. Prezıdent keshegi halyqqa arnaǵan málimdemesinde «Tózim tilekke jetkizedi» degen tolymdy sóz aıtty. Sondyqtan qazaqstandyq ısteblıshmenttiń tótenshe jaǵdaı rejimin 11 mamyrǵa deıin sozýy men sodan keıingi merzimde de saqtyq sharalaryn saqtap, sabyrlyqqa shaqyrýy halyq tarapynan da quptalyp otyr. О́ıtkeni, kez kelgen el úshin eń basty qundylyq – adam. Al adam densaýlyǵy – memlekettiń de saý-salamattylyǵynyń kórsetkishi. Osy oraıda Prezıdent halyqtyń sanıtarlyq qaýipsizdik pen jaýapkershilikti bosańsytyp almaýynan bólek, Úkimetke halyq densaýlyǵy jáne densaýlyq saqtaý júıesi týraly jańa kodeksti jetildire túsetin usynystar engizýdi tapsyryp otyr. Bul rette indetpen kúreste otandyq ǵylymdy ilgeriletýdiń de oraıy kelip tur. Iаǵnı qazaqstandyq ǵalymdarǵa ımmýnobıologııalyq preparattardy ázirleýde qolda bar múmkindikterdi paıdalaný jáne otandyq ónimge basymdyq berý qajettigi aıtyldy. Sondaı-aq Úkimet pen Ulttyq bankke daǵdarystan keıingi kezeńge daıyndalý, ekonomıkany qalpyna keltirý josparyn ázirleý júkteldi.
Emniń aldy – eńbek. Qazir qazaqstandyqtar qoǵamdaǵy qalypty tirshiligine qaıta oralýdy taǵatsyzdana kútýde. Bul úshin bir ǵana shart bar – bosańsymaý. Iá, bir ókinishtisi, «kózi aýyrǵan kúndi kórmeıdi» degendeı, qazir jer álem jasaryp, jan-jaq jasyl túspen jasanǵanda, jan-dúnıeń sol ǵajap álemniń aıasynan qater kútip, jasqanyp turatyn boldy...