Sát saıyn ǵylym damyp, órkendep keledi. Árbir salanyń kúrdeli máselelerine qatysty jaýapty da ǵylymnan tabýǵa bolady. Taraz qalasyndaǵy Nazarbaev zııatkerlik mektebiniń 10-synyp oqýshysy Aıaýlym Ádilova banan men apelsın qaldyǵynan aýyl sharýashylyǵyna qajetti organıkalyq tyńaıtqysh óndirýdi usynýda. Jas ǵalym kúndelikti turmysta paıda bolatyn qaldyqtardy, sonyń ishinde banan men apelsın qaldyqtaryn tyńaıtqysh retinde qoldaný arqyly birqatar agrarlyq máseleni sheshýge bolatynyn aıtady.
«Qazir kóbine ósimdik sharýashylyǵynda adam densaýlyǵy men qorshaǵan ortaǵa zııandy hımııalyq zattar qoldanylady. Oǵan balama retinde bıologııalyq tyńaıtqysh – banan men apelsın qaldyǵyn qoldanýdy usynamyn. Zertteý jumysymnyń barysynda túrli tájirıbeler jasap, oń nátıjelerge qol jetkizdim», deıdi Aıaýlym Ádilova. Jas ǵalym hımııa pániniń muǵalimi Elmıra Ákimovanyń jetekshiligimen tájirıbeler jasap, atalǵan organıkalyq qaldyqtardyń paıdaly elementterge baı ekenin jáne sharýashylyqtaǵy tıimdiligin anyqtapty. Sonymen qatar Aıaýlym sáýir aıynda ótetin III halyqaralyq «Hımık-zertteýshi» úzdik ǵylymı joba saıysyna shaqyrtý alǵan eken. Búginde atalǵan sharaǵa daıyndyq ústinde. «Elimiz qaýipti indetti eńserip, karantın aıaqtalsa, mindetti túrde jarysqa qatysamyz dep otyrmyz. Qazir oqýshym ekeýmiz kúndelikti Skype arqyly kezdesip, jobany damytý ústindemiz», deıdi pán muǵalimi.
Jambyl oblysy