Otandyq IT-mamandardyń qolǵabysy

Sıfrlyq damý vıse-mınıstri Abylaıhan Os­panovtyń aıtýynsha, tó­tenshe jaǵdaı kezinde kóp­tegen IT-kompanııa áleý­mettik jaýapkershilik alyp, kómek qolyn sozdy.

«Elimizdegi IT-qo­ǵam­dastyqtyń ózine áleý­met­tik jaýapkershilik alǵan  sátteri az emes. Árip­tes­ter azamattarǵa jańa ómir saltyna beıim­delip, qyzmet­terdi qashyq­tan alýǵa qajet­ti túrli ázir­lemeler jasaýǵa bel­sendi qatysty», dep atap ótti A.Ospanov.

Mysaly, ESQ-ny qa­shyq­tan alý qyzmetin «Ult­tyq aqparattyq tehnologııalar» AQ BTS Digital kompanııasymen birlesip iske asyrdy. Kompanııa qashyqtan sáıkestendirý servısin tegin usyndy. Búginde 215 myńnan asa qazaqstandyq ESQ-ny onlaın resimdedi. Densaýlyq saqtaý salasyna qatysty 15 túrli sheshim bar. Atap aıtqanda, Ulttyq saraptama ortalyǵynda zerthanalyq zertteýler júrgizý prosesi avtomattandyryldy, COVID-19 derekterdi basqarý júıesi quryldy. Smart Astana mobıldi qosymshasynda «Men karantındemin» fýnksııasy iske qosyldy, al eGov mobile-da COVID-19 testileý úshin saýaldamany toltyrý múmkindigi paıda boldy. Aıta ketý kerek, bul sheshim­derdiń basym bóligi tegin jasaldy.

Help.coronavirus2020kz­ por­talyn iske qosý – otandyq aıtıshnıkterdiń jumysynyń nátıjesi. Osymen birge ekinshi deń­geıli bankter shotty onlaın ashý qyzmetin shuǵyl túrde usyndy. Blok-beketterden ótý rásimin tezdetý úshin iQala.kz portalynda Qorgan ­servısi, sondaı-aq júk­ tasy­maldaýshylarǵa beriletin ruqsatty elektrondy tekserý qyzmeti jáne t.b. iske qosyldy. IT-kompanııalar qazaqstandyqtarǵa bilim berý salasyndaǵy óz ónim­derin paıdalanýda birqatar jeńildik usyndy. Mysaly, Bilim media Group jáne Daryn Online platforma­lary óz servısterin aqy­syz rejimge kóshirdi. Platonus kompanııasy 1 shil­dege deıin eldegi búkil kolledjderdi óz júıesine tegin qosýǵa nıetti. «О́rleý» ınnovasııalyq tehnologııa­lar ortalyǵy qashyqtan oqytý jáne testileý júıesin tegin usyndy. Otandyq baılanys operatorlary bolsa, barlyq bilim berý resýrstary úshin jumsalǵan trafıkti tarıftemeıtin boldy.