Bul týraly Densaýlyq saqtaý mınıstri Eljan Birtanov Facebook paraqshasynda jazdy.
«Biz búginge deıin 250 myńnyń shamasynda 4 kategorııa boıynsha tegin test jasadyq. Olar – shet elden kelgender, koronavırýspen aýyrǵandar jáne olarmen baılanysta bolǵandar, karantın kezinde qyzmetin toqtatpaǵandar (medısına qyzmetkerleri, áskerı qyzmetshiler, kommýnaldyq qyzmet, saýdamen aınalysatyndar jáne t.b.), qarttar úıi kontıngenti. Úshinshi jáne tórtinshi kategorııadaǵylardyń 90%-y testten ótti. Barlyǵy tegin (shamamen, 70 myń adam). Bul ońaı sharýa emes, ári shyǵyndy da qajet etetin shara. Bıýdjettiń 2,8 mlrd teńgesi osy baǵytqa jumsaldy», - dedi mınıstr.
Sondaı-aq mınıstr eldegi epıdemııa áli toqtamaǵanyn, degenmen, ekonomıkany kezeń-kezeńmen qalpyna keltirý kerek ekenin atap ótti.
«Bolashaqta epıdemııa jaǵdaıy turaqtalǵan soń halyqty úsh baǵyt boıynsha testileýge kóshý máselesi qolǵa alynbaq. Iаǵnı, vırýs juqtyrǵandar jáne olarmen baılanysta bolǵandardy tegin medısınalyq kómektiń kepildik berilgen kólemi (TMKKK) aıasynda bıýdjet esebinen testileý, áleýmettik keste boıynsha jumys isteıtin saqtandyrylǵan azamattardy – MÁMS esebinen. Medısınalyq qyzmetkerler men áskerılerdi memlekettik qarjylandyrý esebinen testileý múmkindigi qaralyp jatyr. Al, qalǵandaryn aqyly túrde testileý», - dedi Eljan Birtanov.