Búgin Almaty oblysynyń Kegen aýdanynyń taǵy 3 turǵynynan koronavırýs belgisi anyqtaldy. Bul alaqandaı aýdan ortalyǵynda tirkelgen altynshy oqıǵa. Indettiń budan ary taralmaýy úshin Kegen aýylyn ýaqytsha oqshaýlaý týraly sheshim qabyldandy.
Juqpaly indetpen aýyrǵan osy aýyldyń 1957, 1971 jáne 1987 jyly týǵan turǵyndary. Olardyń ekeýi buǵan deıin aýyrǵan syrqatpen baılanysta bolǵandyqtan Kegen aýdandyq ortalyq aýrýhananyń provızorlyq bóliminde karantınde jatqan bolatyn. Endi 3 naýqas ta Qarasaı aýdandyq aýrýhanasynyń ınfeksııalyq bólimine jatqyzylady. Búgin aýyrǵan 3 naýqaspen 12 adam baılanysta bolǵan. Kúdiktilerdiń bári oqshaýlanyp, epıdemıologııalyq tekserý júrgizilýde.
- Qazirge deıin Kegen aýdanynda koronavırýspen aýyrǵandar sany 6 adamǵa jetti. Tótenshe jaǵdaıǵa baılanysty Kegen aýdanynyń bas memlekettik sanıtarlyq dárigeriniń arnaıy qaýlysy shyqty. Oǵan sáıkes búginen bastap aýdan ortalyǵy – Kegen aýyly ýaqytsha karantınge jabylady, - dep habarlaıdy Almaty oblysy ákiminiń baspasóz qyzmeti.
Almaty oblysy