Jýyrda Petropavl qalasynyń kóshesinde maska kıip alǵan azamat motosıklmen qashyp, polısııanyń ysqyryǵy túgil sońyna túsip qýǵanyna qaramaı, aqyry sońynan dabylyn bezildetkenderdiń 5-6-ýyn ertip baryp, qorshaýǵa túskende ǵana kúshpen toqtatyldy. Sóıtip, qanshama halyqtyń úreıin ushyrdy, jol tártibin buzyp apatty jaǵdaı týǵyzdy. Onyń qashýy men qýǵynynyń beınekórinisi keshe jáne búgin barlyq áleýmettik jelilerdiń betinen túspedi.
Oqıǵa jeti túnde, halyq uıyqtap jatqanda Gashek pen Ýálıhanov kósheleriniń qıylysynda bolǵan. Júrgizýshi bala-shaǵa da emes, 36 jastaǵy araqqa sylqııa toıyp alǵan azamat bolyp shyqty. «Betperdeńdi shesh» degen polısııa qyzmetkeriniń talabyn da moıyndamaı, kameraǵa betin kórsetpeı qasarysyp turdy. Osyndaılarǵa polısııanyń kúsh qoldanbaýy múmkin be? Ondaılar tek kúshti ǵana moıyndaıdy emes pe? Eger olarǵa qarsy kúsh qoldanbasa turǵyndardyń qaýipsizdigi qalaı saqtalady?
Esersoq 15 táýlikke qamalyp, kólik júrgizý quqynan 7 jylǵa deıin aıryldy. Sońǵy eki kúnde Petropavlda budan basqa da bir mas adam motosıkl júrgizip, jol erejesin buzyp bara jatqanda ustaldy. Bul tipti 44 jastaǵy adam. «Kári túıe oınaqtasa jut bolar» degendeı jastary egdelenip, bala-shaǵalary ósip qalǵan osyndaılardyń jas balasha eki aıaqty motosıkldy qyzyqtap, eshteńe qaramaı aıdaǵanyna tań qalasyń. Urpaǵyna qandaı úlgi beremiz dep oılaıdy eken?
«Jol qozǵalysy erejelerin qatań saqtaý – barlyq kólik quraldary júrgizýshileriniń qaýipsizdigin qamtamasyz etedi. Motosıkl júrgizýshileri erekshe baqylaýda», - dep atap ótti patrýldik polısııa batalony komandıriniń mindetin atqarýshy Qanat Álimjanov.