«Biz birgemiz!» aksııasy aıasynda oblystyq «77TV» telearnasy tótenshe jaǵdaı kezinde el nazaryn Tabıǵat ananyń tylsym sulýlyǵymen qanyqtyrý maqsatynda erekshe ıgi bastamany qolǵa alǵany belgili.
Atap aıtqanda, «77TV» arnasy Jambyl oblysy otan-oshaǵy bolyp sanalatyn jabaıy qyzǵaldaqtyń gúldeý kezeńinde eko-týrızmge arnalǵan materıaldardy túsirý boıynsha fotoekspedısııaǵa aqparattyq qoldaý kórsetti.
Bul fotoekspedısııa oblystyq Týrızm basqarmasynyń uıymdastyrýymen Jýaly, Qordaı, Merki aýdandarynda ótkizildi.
Maqsaty – Jambyl oblysynyń tabıǵı florasy men faýnasy týraly joǵary sapaly fotomaterıaldar daıyndaý jáne bizdiń aımaqtyń ereksheligi sanalatyn qyzǵaldaqtardy keńinen nasıhattaý.
Dál osy fotomaterıaldar bolashaqta óńirimizge týrısterdi tartý úshin týrıstik katalogtar, broshıýralar, býkletter jáne basqa da jarnamalyq materıaldardy daıyndaýǵa negiz bolmaq.
Tarıhy tereń, tabıǵaty sulý kıeli Jambyl jeriniń jaýqazyndaryn halyqtyń nazaryna usyný sharasyna Jambyl oblysy ákimdiginiń tabıǵı resýrstar jáne tabıǵat paıdalanýdy retteý basqarmasy, oblystyq «Aq jol», «Znamıa trýda», «Araı» gazetteri atsalysty.
Altynbek QARTABAI