Jambyl oblysynyń Qordaı aýdany óńirdegi kúrdeli aýdannyń biri. Qazirgi kezde aýdan ákimdigi tarapynan aýyldarda bilim berý sapasyn arttyrý, jastardy ulttyq rýhta tárbıeleý jumystary júrgizilýde.
Aýdan ortalyǵy Qordaı aýylyndaǵy №1 D.Qonaev atyndaǵy mektep-gımnazııasy men №4 B.Bóltirikova atyndaǵy mektep-lıseıi de bul bastamaǵa laıyqty úles qosyp keledi. Qordaı aýdanynyń ákimi Rústem Dáýlet atalǵan bilim oshaqtarynyń jaı-kúıimen tanysty. Bilim nysandaryn aralaǵan ákim atalǵan mektepterdiń jaǵdaıymen jaqynyraq tanysyp, sheshimin tappaı kele jatqan kúrdeli máselelerdiń aýdan deńgeıinde sheshý joldaryn qarastyrdy.
Eń áýeli Rústem Dáýlet oblys boıynsha úzdikterdiń qatarynan kórinip júrgen №1 D.Qonaev atyndaǵy mektep-lıseıinde boldy. Mektep dırektory S.Sarǵasqaeva aýdan ákimine mektep ǵımaratyn kórsetip, oqýshylardyń jetistikterimen bólisti. Atalǵan bilim oshaǵy sońǵy jyldary bilim salasyndaǵy táýekel dárejesin baǵalaýdyń 39 krıterııi boıynsha barlyq talaptardy oryndap, sońǵy úsh jylda aldyńǵy qatardan kórinip keledi. Atalǵan mektepte búginde 1400-den astam oqýshy bilim alady. Munda 50-den astam túrli mektep úıirmeleri jumys isteıdi. Nátıjesinde atalǵan mektep oqýshylary oblystyq, respýblıkalyq saıystarda, tipti halyqaralyq deńgeıdegi baıqaýlarda top jaryp, aýdan namysyn qorǵap júr. Alaıda osyndaı úlgili bilim berý mekemesinde ózekti máselelerde de bar bolyp shyqty. Birinshiden oqýshylar úshin eń qajetti sport jáne akt zalynyń tóbesinen sý aǵyp, qolaısyzdyq týdyrýda eken. Budan keıin mektep úshin basseın máselesi ózekti. Paıdalanylmaı turǵanyna biraz jyl bolǵan haýyz kúrdeli jóndeýdi de talap etedi. Aýdan ákimi men mektep dırektory onyń ornyna sportpen aınalysatyn balalarǵa arnap kúres zalyn ashyp, mektep janynda ornalasqan sport mektebiniń oqýshylary úshin jattyǵý zalyn jasaý kerektigi týraly ortaq sheshimge keldi. Sonymen qatar, mektep dırektory S.Sarǵasqaeva «Mektebimizde shyǵarmashylyqpen aınalysýǵa nıet bildirgen oqýshylar sany kóp, degenmen sheberhana men eńbek sabaǵyna qajetti zattardyń bolmaýy qıyndyq týǵyzyp tur. Osyǵan qoldaý bildirseńiz», dep, aýdan ákimine suranysyn jetkizdi. Rústem Dáýlet eńbek kabınetinde de bolyp, oqýshylardyń jasaǵan buıymdaryn kórdi. Ol aýdan ákimdiginiń bilim bólimimen birlesip qajetti zattar alý úshin usynys berýdi tapsyrdy.
Sondaı-aq, ol mektep aýlasyndaǵy abattandyrý jumystaryna da kóńil bólip, mundaǵy jaryqtandyrý jumystary, oryndyqtardy jańartý, gúlzarlardy qalypqa keltirý jáne daladaǵy sport alańshalarynyń standartqa sáıkes bolýy kerektigin basa aıtty. Al, mekteptiń aýlasyndaǵy syrtqy jumystary boıynsha aýyl ákimi B.Sahatovqa tıisti tapsyrma berdi. Keıinnen Rústem Dáýlet №4 B.Bóltirikova atyndaǵy mektep-lıseıde de boldy. Byltyr ǵana kúrdeli jóndeýden ótken bilim nysanynyń jaǵdaıymen tanysqan ákim mektepti bezendirý boıynsha dırektorǵa syn eskertpelerin aıtty. Sonymen qatar, mektep basshysyna tıisti sharalar qabyldaý qajettigi jóninde de tapsyrma berdi.
Aýdan ákimi Rústem Dáýlet mektepterdi aralaý barysynda «Ábý Nasyr ál-Farabı, Abaı Qunanbaıuly, Ahmet Baıtursynuly syndy uly tulǵalardyń tárbıelik máni bar qanatty sózderi mekteptiń kórneki oryndarynda jazylý kerek. Danalardyń sózderi óskeleń urpaqty tárbıeleýde taptyrmaıtyn qural», dep mektep dırektorlaryna aqparattyq bezendirýler týraly usynysyn jetkizip, oqýshylardyń bilim sapasyn arttyrý jóninde tapsyrmalar berdi.
Jambyl oblysy