Oblys ákimi Ermek Marjyqpaevtyń tóraǵalyǵymen ótken apparat keńesinde aýyl sharýashylyǵy jerlerin paıdalaný barysynda kezdesip jatqan birqatar máseleler men óńirde júrgizilip jatqan jol qurylysy jumystarynyń jaı-kúıi talqylandy.
Apparat keńesiniń kún tártibine oraı jerdiń paıdalanylýy men qorǵalýyn baqylaý basqarmashysynyń basshysy Erǵalı Shorın aýyl sharýashylyǵy jerlerin paıdalaný boıynsha júrgizilip jatqan jumystar týraly baıandama jasady. Basqarma basshysynyń málimdeýinshe, ótken jyly oblysta 1,5 mıllıon gektar aýyl sharýashylyǵy jerleriniń bos jatqandyǵy anyqtalypty. Aýdandyq ákimdikterdiń málimetterine súıensek, 764,3 myń gektardan astam jer paıdalanýǵa berilgen, ıaǵnı onyń 148 myńǵa jýyq gektary egistik alqaptary bolsa, 603 myń gektar jer mal jaıylymdaryna arnalypty. Bos jatqan jerlerdi anyqtaý boıynsha birqatar túıtkildi jaılar aıtyldy. Oblys ákimi aýdan basshylary men atalmysh basqarmaǵa bos jerlerdi neǵurlym kóbirek anyqtap, olardy tıimdi paıdalaný ári zańǵa saı ıgerýdi qadaǵalaýdy tapsyrdy. Aýdandarda bul jumys áli de báseńdeý júrgizilip jatqandyǵyn eskertti. Sondaı-aq, jergilikti oryndarda paıdalanylmaıtyn jerlerdi memleketke qaıtarý, ony aınalymǵa jiberý jumystaryn uıymdastyrýdy jandyrý qajettigin atap ótti. Bul oraıda, Atbasar, Býrabaı, Selınograd aýdandary men Stepnogorsk qalasynda halyqqa bos jatqan jerlerdi ıgerý boıynsha túsindirmelik jumystar oń nátıjege ıe bolǵandyǵy aıtyldy. Qazirgi ýaqytta birqatar aýdandarda bos jatqan jerlerdi anyqtaý boıynsha jumystar veb-portal arqyly júrgizilýde. Degenmen, jerlerdiń tıimdi ıgerilýine tekseris júrgizýge qazir moratorıı jarııalanǵan eken.
Jer qatynastary basqarmasynyń basshysy Baýyrjan Ernazarov aýyl sharýashylyǵy alqaptaryn sıfrlandyrý jáne jeke quramǵa jaıylymdyq jerlerdi berý týraly baıandady. Qazirgi ýaqytta jer qatynastary salasynda aýyl sharýashylyǵy alqaptaryn esepke alý, halyqqa jeke maqsattarynda paıdalanýǵa jerlerdi berý máselelerine erekshe kóńil bólinip jatyr. Bul másele memleket basshysynyń da jeke baqylaýynda ekendigi belgili. Oblysta aýyl sharýashylyǵy maqsatynda 11 mıllıon gektarǵa jýyq jer bar. Solardyń ishinde búgingi kúni 10 mıllıon 356 myń gektary ǵana Qoldau.kz portalynda esepke alynypty. Basqarma basshysynyń málimdeýinshe, Ereımentaý aýdanynan basqa aýdandarda jergilikti turǵyndar úshin paıdalanylatyn alqaptar tapshy. О́ńirdegi 617 aýyldy jerdiń 495-inde mal jaıýǵa arnalǵan jerler joq dese de bolady. Osy tusta aýyldy aımaqtardaǵy mal jaıylymdarynyń máseleleri, jerdi ıgerýge alǵan sýbektilerdiń zańnamalyq qujattardy toltyrýdaǵy olqylyqtary men jerdi ıgere almaý jaǵdaılaryna qatysty daýly jaıttardyń da bary aıqyn kórindi. Shyntýaıtyna kelgende, aýyldy aımaqtardaǵy bos jatqan jerlerdi keıbir turǵyndar belgili bir kásip bastamaqshy bolyp, atyna túsirip alyp, keıin ol jerde ne shóp shyqpaıdy, ne mal baǵýǵa bolmaıdynyń kebin kıetini bar. Osy oraıda, aýyl turǵyndary maldaryn jaıa almaı, ári-sári kúıge túsip, maldarynyń egindik jerlerge shyǵyp ketpeýine, bireýdiń ıeligindegi jerge ketip qalmaýyna shyr-pyr bolatyny da bar. Qazirgi tańda osy máselelerdi sheshý boıynsha arnaıy jumystar júrgizilip jatyr dedi basqarma basshysy.
Aımaq basshysy sonymen birge koronavırýs pandemııasy boıynsha oblysta jaǵdaı turaqty ekendigine nazar aýdaryp, indetpen kúresip, naýqastarǵa jaǵdaı jasaǵan Arshaly aýdandyq aýrýhanasynyń ujymyna alǵys bildirdi. Qazir bul aýrýhanadan barlyq kúdikke alynǵan adamdar emdelip shyqty.