Bul týraly Memleket basshysy Qasym-Jomart Toqaev «Egemen Qazaqstan» gazetine bergen «Elimiz bul qıyndyqtan shyńdalyp shyǵady» atty suhbatynda aıtty.
«Tótenshe jaǵdaı kezinde ekinshi deńgeıdegi bankter áleýmettik-ekonomıkalyq ahýaldyń turaqtanýyna óz úlesin qosty dep aıta alamyz. Eń aldymen, bankter kásipkerlerge jáne azamattarǵa bergen nesıeni qaıtarý merzimin keıinge aýystyrdy. Naqty aıtqanda, nesıe tólemderi 3 aıǵa shegerildi. Tabysynan aıyrylǵandarǵa mundaı kómek qajet. Biraq, jurtshylyq arasynda nesıeni múldem qaıtarmaımyz degen túsinik qalyptaspaýy kerek. Bul – jańsaq pikir», - dedi Prezıdent.
Prezıdenttiń aıtýynsha, Úkimettiń qatysýymen shaǵyn jáne orta bıznes ókilderine jeńildetilgen nesıe berý baǵdarlamasy ázirlendi.
«Eger bankter kásipkerlerge, azamattarǵa nesıe berýdi toqtatsa, ekonomıkanyń kóptegen salasy turalap qalady. Biz buǵan jol bermeımiz. Meniń tapsyrmam boıynsha Ulttyq bank pen Qarjy naryǵyn retteý jáne damytý agenttigi qarjy júıesiniń turaqtylyǵyn saqtaý úshin qosymsha sharalar qarastyrýda», - dedi Prezıdent.