Túlekter testti 11-synyp baǵdarlamasynyń tórtinshi toqsanyndaǵy suraqtarsyz tapsyrady, dep habarlaıdy Nur-Sultan qalasy ákimdiginiń resmı saıty.
Ulttyq biryńǵaı testileý (UBT) burynǵy formatta qalady. Mektep bitirýshilerdiń UBT-ǵa qatysýǵa onlaın-ótinimderi 1 sáýirden 10 mamyrǵa deıin qabyldanady, dep habarlady búgin brıfıngte qalalyq bilim basqarmasynyń bastyǵy Sholpan Qadyrova. «Bıyl túlekter UBT-ny 11-synyp baǵdarlamasynyń tórtinshi toqsanyndaǵy suraqtarsyz, ıaǵnı 5-synyptan 11-shi synyptyń úsh toqsanyna deıingi suraqtar boıynsha tapsyrady», – dedi Sh.Qadyrova. Onyń aıtýynsha, qashyqtan oqytýdy sátti ótkizý maqsatynda stýdentter men oqytýshylar úshin kompıýterler men ınternetke qol jetimdilik monıtorıngi júrgizilgen.
«Másele mektep balansynda turǵan 7118 kompıýterdi (6500 oqýshy, 618 muǵalim) ýaqytsha paıdalanýǵa berý arqyly sheshildi. Sonymen qatar 2613 noýtbýk jáne ınternetke qosylǵan 5200 flesh-karta satyp alyndy. Jalpy, kompıýterlik tehnıkanyń qol jetimdiligi 100%», – dedi Sh.Qadyrova.
Sonymen birge, Bilim jáne ǵylym mınıstriniń buıryǵyna sáıkes, bıyl 9 jáne 11 synyptar úshin qorytyndy attestattaý bolmaıdy. Al qorytyndy baǵalar jyldyq nátıje boıynsha qoıylady.
«Aptasyna eki nemese odan da kóp saǵattan turatyn pánder boıynsha (BJB) jıyntyq baǵalaýdyń ýaqyty – 4-11 mamyr, aptasyna bir saǵattan júkteletin akademııalyq pánder boıynsha sabaq kestesi – 11-15 mamyr. Toqsan saıynǵy jıyntyq baǵalaý (TJB) bir ret – 18-22 mamyrda ótkiziledi. BJB ýaqyty – 20 mınýt, TJB ýaqyty – 40 mınýt. 1-4 synyp oqýshylary úshin BJB jáne TJB ótkizý ýaqyty shektelmeıdi», – dep atap ótti Sh.Qadyrova.
BJB jáne TJB mólsheri bir kúndegi úsh jıyntyq jumys kóleminen aspaıdy. Sonymen qatar óner, ózin-ózi taný, mýzyka, dene tárbıesi, bıznes jáne kásipkerlik negizderi, grafıka jáne dızaın, áleýmettik zertteýler, dintaný sııaqty pánderde BJB jáne TJB bolmaıdy. Muǵalim bilim berý platformalaryna (Kúndelik.kz, BilimLand jáne t.b.) jıyntyq jumystyń oqý tapsyrmalaryn júktep, oqýshylarǵa jıyntyq jumysty aıaqtaýǵa ártúrli baılanys quraldaryn usyna otyryp BJB jáne TJB júrgize alady. Oqýshylarǵa, ata-analarǵa nemese balanyń zańdy ókilderine Kúndelik.kz platformasynda kez-kelgen qol jetimdi baılanys quraldary (elektrondy poshta, chat, Telegram jáne t.b.) arqyly túsinikteme nemese aıdar túrinde keri baılanys usynylady.