Jeńis kúni qarsańynda Qyzylorda qalasyndaǵy Nazarbaev Zııatkerlik mektebiniń oqýshylary Otan úshin ot keshken ata-ájeleri týraly áleýmettik jelilerde baıandaýdy jón kóripti.
«Jeńisti jaqyndatýǵa meniń atam Zeınet Ibeevtiń qosqan úlesi zor», – deıdi mekteptiń 7-synyp oqýshysy Marǵulan Mnajaddın.
Shóberesi atasynyń surapyl soǵysta jasaǵan erligi men beıbit kúnderdegi eńbegin maqtan tutady: «Men atamnyń erligine maqtanamyn jáne onyń aldynda bas ıemin. Osyndaı beıbit aspanda ómir súrý baqytyn syılaǵan ardagerlerimizdi eshqashan umytpaýymyz kerek» deıdi ol..
Otty jyldar estelikterimen bólisý arqyly jas zııatkerler batyrlarymyzdyń erligin jas urpaqqa tanystyryp, táýelsiz elimizde tynyshtyq syılaǵan ardagerlerimizge sheksiz alǵystaryn bildiredi.
Qazir oblysta 16 soǵys ardageri qaldy. Onyń biri 97jastaǵy Kálep Bekturǵanov. Jas zııatkerler Qyzylordadan ásker qataryna shaqyrtylǵan sarbazdyń ómiri men onyń maıdan dalasynda jasaǵan erlikteri jaıynda zertteý jumystaryn júrgizdi. Otan úshin oqqa tosqan keýdesi búginde orden-medalge toly maıdangerdiń erlikke joly ómirimen tanysty.
Jyl ótken saıyn soǵys tarıhy alystap, ardagerler qatary sırep barady. Alaıda olardyń jasaǵan erligi búgingi urpaq sanasynda máńgi saqtalady.