Túrkistan oblysynyń bilim berý salasynda, sonyń ishinde kadr máselesin sheshýde, memlekettik baǵdarlamalarǵa qarastyrylǵan qarjyny jumsaý men memlekettik satyp alý barysynda sybaılas jemqorlyq quqyq buzýshylyqtary beleń alýda.
Mysaly, bıyldyń alǵashqy 3 aıynda bilim berý salasynda tirkelgen 16 qylmystyq quqyq buzýshylyq boıynsha bir tulǵa qylmystyq jaýapkershilikke tartylǵan. Bul týraly Sybaılas jemqorlyqqa qarsy is-qımyl agenttiginiń Túrkistan oblysy boıynsha Departamenti bastamasymen oblysqa qarasty bilim berý uıymdarynyń basshylarymen ótken onlaın-konferensııada aıtyldy. Departament basshysynyń birinshi orynbasary Mıras Qarǵabaı óńirdegi bilim berý mekemelerinde jıi kezdesetin sybaılas jemqorlyq derekteriniń týyndaý sebepterine toqtaldy. Mektepterde zańsyz aqsha jınaý derekteri negizinen, tıisti mekemeler júrgizetin jyl saıynǵy tekserýler kezinde mektep dırektorlaryna salynǵan aıyppuldardan týyndaıtyny jáne aıyppul somasynyń edáýir kóp mólsherde bolýyna baılanysty muǵalimder men ata-analardan jınalatyny zerdeleý barysynda anyqtalǵan.
Konferensııada aýdandyq, qalalyq bilim bólimderiniń basshylary men mektep dırektorlaryna zańsyz aqsha jınaý derekterin boldyrmaý boıynsha aqparattyq - aǵartý jumystary júrgizilip, oblysqa qarasty bilim berý mekemeleri Departamenttiń tikeleı baqylaýynda ekendigi eskertildi. Al oblystyq Adamı áleýetti damytý basqarmasynyń basshysy Rahymbek Jolaev bilim bólimderiniń basshylaryna sybaılas jemqorlyqqa jol bermeý boıynsha birqatar mindetter júktedi.
Túrkistan oblysy