Saýda-sattyqtyń toqyraýy saldarynan Qazaqstan ekonomıkasy 1,3 trln teńgeden aıyrylýy múmkin. Saýda sektoryna koronavırýstyń keltiretin keselin saraptaǵan Finreview.info osyndaı baılamǵa keldi.
Naýryz aıynda eldegi iskerlik belsendilik kóp jyldan beri bolyp kórmegen deńgeıge quldyrady. Kásipkerler ekonomıkanyń eń mańyzdy sektorlarynyń kóbinde jaǵdaı kúrdeli ekenin aıtady. Elektrondy kommersııanyń ózi bızneske karantın sharalarynyń tıgizip jatqan teris áserin tejeı almaı, burynǵy tabys kózden bulbul ushty.
Eń qatty quldyraǵan sala – qyzmet kórsetý salasy. Mamyr aıynda onyń ındeksi 38,7 tarmaqty qurady. Jańa tapsyrystardyń azdyǵy, qurylys jumystarynyń tómendeýi men jumys ornynyń azaıýy qurylys sektorynyń da kórsetkishin 43,5 tarmaqqa tómendetti.
Aqpan aıynan bergi aralyqta kásipkerlerdiń tabysy azaıyp, shyǵyny men bereshegi kóbeıip barady. Úsh aı ishinde otandyq kompanııalar tabysynyń 72 paıyzynan aıyrylǵany osyny kórsetedi. О́ndirýshi sektordaǵy kompanııalardyń tabysy 6 ese tómendese, qyzmet kórsetý salasyndaǵy kásiporyndardyń kirisi 3 eseden artyq quldyrady.
Iskerlik belsendilik ındeksi – sheshýshi makroekonomıkalyq ólshem sanalady. Ony esepteý barysynda ónerkásip, qurylys jáne qyzmet kórsetý salalary nazarǵa alynady. Bıznes ókilderiniń arasynda saýalnama júrgizý arqyly kásipkerlik saladaǵy ahýalǵa kóz jetkizýge bolady. Onyń deńgeıi 50 tarmaqtan joǵary bolsa, kórsetkishtiń ońalǵanyn bildiredi.