Soǵystan da, eńbekten de ordeni bar

Jaqynda  95 jasqa tolatyn­ aq­saqal búginde syrtqa kóp shyq­paıdy. О́ıtkeni sonaý soǵystyń jú­rekke salǵan salmaǵy áli kúnge aýyr, ári ystyqqa da, sýyqqa da tózip, qandy shaıqasta da, qar­qyndy eńbekte de bar kúsh-qaı­ratyn aıanbaı jumsaǵandyqtan, sondaı-aq qarttyǵy «qamaýǵa» alǵandyqtan ár-ár jeri aýyrady, taıaqqa súıenip júredi.

Degenmen, qurmettep úıine kelip sálem bergender men ne­mere-shóberelerine  asyqpaı aıtatyn áserli áńgimesi jetip artylady. Sebebi oıyndaǵy otty  kún­der men kóńilindegi kóp ıgi ister kómeski tartpaǵan, basynan kesh­keniniń bárin eskirtpeı esine alady...

Chaıke atamyz 1925 jyly 5 mamyrda Qaskeleń (qazirgi Qarasaı) aýdanyndaǵy Eńbekshi aýylynda týǵan eken. 1942 jyly naýryz aıynda komsomolǵa ótedi, al týra bir jyldan soń áskerı komıssarıattan shaqyrtý keledi. Munan keıin Petropavl qalasynda úsh aı aılyq daıyndyqtan ótisimen, nemis fashısterimen so­ǵysqa jiberilgen.

Alasapyranǵa toly aýyr jo­ryq joldary jas jigitti Mo­gılev, Jı­tomır qalalaryna deıin aparyp, 1943 jyly qazan aıynda Mınsk qalasynyń túbindegi bir aıqasta jaralanǵan. 1944 jy­ly naýryzda Ýdmýrtııadaǵy Kızner  stansasyndaǵy gospıtal­dan shy­ǵyp, qan maıdanǵa qaıta oralǵan.

Sodan Brıansk qalasy, Lıtva, Shy­ǵys Prýssııa, Rýmynııa, Ke­nıs­bergtegi soǵystarǵa qatys­qan. 1945 jyly aqpan aıynda erligi úshin Qyzyl Juldyz or­denimen nagradtalǵan. Basqa da jaýyngerlik medaldary bar. Aıtqandaı, maıdan dalasynda taǵy da bir ret jaralanypty.

Soǵystan soń da áskerde qyz­met etip, elge tek 1948 jyly qaı­typty. Beıbit  eńbekte de (qury­lysshy) berekeli isimen tanyl­ǵan ardaqty atamyz endi  keý­desine Eńbek Qyzyl Tý or­denin jar­qyrata taǵypty. Bir qy­zyǵy, Chaıke atamyzdyń aldyńǵy qatar­ly eńbekker retindegi sýreti sol kezdegi odaqtyq «Trýd» gazetine jáne «Qazaqstan áıelderi» jýrnalyna shyǵypty.

Marqum kempiri Kúpan áje Kem­pi­rekqyzy ekeýi úsh ul, eki qyzdy jaqsy adam etip ósirgen. Olar­­dan 12 nemere, 20 shóbere kórdi.

Mine, surapyl soǵysta gaýbısa deıtin zeńbirektiń oqtaýshysy bol­ǵan, keıinnen sharýashylyqta aldy­men jylqy baqqan, onan soń qurylysshy retinde kóp jumys tyndyrǵan maıdanger qart osyndaı ómiri ónegeli, isi úlgili jan.

Jasaı berińiz, Chaıke ata!

Berikbaı QADYQOV,

jýrnalıst

Almaty oblysy,

Qarasaı aýdany