Kásipker retinde elimizdiń ekonomıkasynda qıyndyqtar bolyp jatqanyn qazirdiń ózinde sezinip otyrmyz. Bul aldaǵy ýaqyttarda budan da qatty bilinýi múmkin. Bizdiń oqytý ortalyqtarymyz ýaqytsha jabyq tur. Jazda da tutynýshylarymyz az bolýy múmkin. Osy alańdatady.
Memleket tarapynan shaǵyn jáne orta kásipkerlikti qoldaý maqsatynda sharalar uıymdastyrylyp jatqanynan habardarmyz. Bul týraly jýyrda Prezıdent Q.Toqaevtyń «Egemen Qazaqstan» gazetinde jarııalanǵan suhbatynda jan-jaqty aıtylypty. Degenmen jasalǵan jeńildikterden keıbir salalar tys qalýda. Mysaly, biliktilikti arttyrý ortalyqtary sol qatarda. Jeńildikter men kómekter barlyǵyna birdeı ortaq júzege asyrylsa degen usynysymyz bar.
Mınıstrlikter barlyǵyna birdeı kózqaraspen qarap qoldaý bildirse, sonyń ózi kásipkerler úshin zor kómek bolar edi. Men memlekettik satyp alýlar týraly nemese qarjylandyrý týraly aıtyp otyrǵan joqpyn. Keıbir kompanııalarǵa memlekettiń qarjysy emes, «Jaraısyń, osy baǵyttan taıma!» degen qoldaýy mańyzdy. Elimizde kásipkerler kóbeıse, jańa jumys oryndarynyń ashylýyna yqpal jasaıdy.
Bizdiń mekememiz onlaın bilim salasynda qyzmetter kórsetedi. Onlaınǵa degen kózqaras osyǵan deıin durys bolmaǵan. Biraq zaman talaby onlaın bilim berý men qyzmet kórsetý ekenin ýaqyt kórsetip otyr. Ony elimizdegi tótenshe jaǵdaı birneshe esege jedeldetip jiberdi.
Jas kásipkerlerdiń kópshiligi IT salasynda. Startup jobalarǵa da kóńil bólinse, ınnovasııalyq aqyl-oı eńbekteri myńdaǵan adamdy jumyspen qamtýǵa qaýqarly bolar edi. Búgingi tańda elimizdiń eń basty resýrsy shıkizat emes, azamattardyń aqyl-oıy dep bilemin.
Berikbol TО́LEGEN,
«SKILLS ACADEMY» JShS dırektory