KÁSIPORYNDAR TOQTAP TUR

Oblys ortalyǵynda 30-ǵa tarta óndiris oryndary óz ju­mys­taryn toqtatyp, jumysshy-qyzmetkerlerin eńbekaqysyz dem­alysqa jiberýge májbúr bol­dy. Olardyń arasynda “Qaznef­te­gaz”, “Munaımash”, “Qurylys mate­rıal­dary”, “Bogatyrskıe pro­dýk­ty” sekildi iri mekemeler mıl­lıondaǵan teńge zalal shegip, kim­nen óndirerin bilmeı dal. “Qury­lys materıaldary” zaýy­tyn­da  ju­mystyń doǵarylǵanyna  20 kún­ge jýyqtaǵan. Sodan beri  onyń dırektory Iýrıı Kasheevtiń  shaǵymdanbaǵan jeri qalmaǵan. Tapsyrystardyń oryndalmaı qalý qaýpin jasyrmaıdy. Kelisim-shart saqtalmasa 20 paıyz aıyp­pul tóleýge týra keledi. “Mu­naı­mash” AQ bas ınjeneri Vıktor Sa­moılovtyń  túńilgeni sonsha­lyq, qolyn bir silteýden basqa amaly qalmaǵanǵa uqsaıdy. Shtan­galy  sorǵylar jasaýǵa tapsyrys bergen qazaqstandyq munaıshy­lar­men eseptesetin kún jaqyn. Olarǵa ne dep túsindirersiń? Kú­nine 20 sorǵy jasap shyǵaratyn­byz. Bir aılyq shyǵynnyń ornyn kim toltyrady, dep shyr-pyr bolady ol. – Bizde birqatar jumys úde­ris­­teri sýmen atqarylady. Onsyz tirligimiz kelispeıdi, isimiz ilgeri baspaıdy. Sý tólemi jóninen qa­ry­zymyz joq. Tıisti oryndar qysqa jan-jaqty qamdanǵanda jo­ǵarydaǵydaı jolsyzdyq oryn almas edi. Olardyń bul tirligin eshná­r­se­men aqtaýǵa bolmaıdy. Tórt júz­den astam adamdy eriksiz dem­alysqa jiberýge týra keldi, – deıdi sýdan taryqqan mekemeler­diń ókilderi. “Petropavl sý” kásipornynyń basshylary sýdyń berilmeı qalýyn qubyrlardyń qatyp qalýymen,  sonyń saldarynan qysymnyń tómendep ketýimen túsindirip álek. Bar kináni ózgege, esh suraýy joq tabıǵattyń tosyn  “syıyna” aýdara  salý – synyqqa syltaý aıtyp úırengen sheneýnik­terdiń ejelgi tásili ǵoı, bulaı bura sóıleý jaýapkershilikten jaltarýdan basqa eshteńe emes. Osyndaıda budan  sýyq kúnderi de  sýdyń jetkilikti kelip turǵany  eriksiz eske túsedi. Bizdińshe, má­sele áride jatqan syqyldy. Me­keme  basshysy S.Begalın byltyr  osy qyzmetke  taǵaıyndalǵanda sý qubyrlary júıeleriniń 80 paıyz­dan astamy­nyń ábden tozǵanyn, aýystyryl­maǵanyn málimdegen edi. Ar jaǵyn ózińiz-aq paıymdaı berińiz. Oblys ortalyǵynyń  shaǵyn  aýdandarynda da sý kolonkalary  isten shyǵyp, turǵyndardyń aýyz sýdan taryǵyp otyrǵan jaılary bar. О́mir ESQALI. Soltústik Qazaqstan oblysy.