Búgin Oral qalasyndaǵy Jeńis alańynda Uly Otan soǵysyndaǵy jeńistiń 75 jyldyǵyna arnalǵan saltanatty shara ótti.
Tótenshe jaǵdaıdyń saldarynan keń kólemde atalmasa da, bul kúni jeńis alańy bos bolmady. Kúrdeli jóndeýden ótip, jańǵyryp qalǵan alańda bul kúnniń qadir-qasıetin uqtyratyn mazmundyq pıondar – jarnamalyq taqtalar kóbeıipti. Onda II dúnıejúzilik alapat soǵysqa qatysqan Qazaqstannyń, sonyń ishinde Batys Qazaqstan óńiriniń úlesi barynsha naqty kórsetilgen.
Osy meıram qarsańynda Jeńis alańynda aspan astynda ashylǵan áskerı tehnıkalardyń murajaıy ashylǵan bolatyn. Munda sol zamannyń ataqty «polýtorka» júk kóligi, 1943 jyly sýasty mınasynyń úlgisi, «Torpeda» zymyrany qoıylǵan. Aıta keteıik, bul mına men zymyran Oral qalasyndaǵy «Zenıt» zaýytynda jasalǵan! Budan bólek alańdaǵy murajaıda shynjyrtaban áskerı tehnıkalar, zeńbirekter qoıylǵan. Karantın aıaqtalyp, indet seıilse, bul jer úlken-kishiniń jıi jıylyp, arnaıy keletin mádenı orynǵa aınalǵaly tur eken.
Uly Otan soǵysy jyldarynda Batys Qazaqstan oblysynan qan maıdanǵa 76265 adam alynyp, sonyń 36548-i ǵana tiri oralǵan eken. Maıdannan alǵan jaraqatynan múgedek bolyp, turmys qıyndyǵyn tartqandar qanshama! Batysqazaqstandyq 39 jaýynger Keńes Odaǵynyń Batyry ataǵyn alsa, 6 adam «Dańq» ordeniniń tolyq ıegeri atanǵan. Búginde osy qyrǵynǵa qatysqan, qanyn tókken, janyn bergen barsha bozdaqtyń esimi dál osy Jeńis alańynda tasqa qashaýly tur.
- Qadirli ardagerler, qymbatty jerlester, barshańyzdy Uly Jeńistiń 75 jyldyǵymen shyn júregimnen quttyqtaımyn! Jeńis kúni – jahandyq surapyl soǵysta aryn – baıraq, namysyn – naıza etken ardager babalarymyzdyń janqııarlyq erlikpen, qaısarlyqpen jeńis jalaýyn jelbiretip, búgingi urpaqqa ashyq aspan, beıbit kúndi amanat etip jetkizgen qasterli merekesi. Prezıdentimiz Qasym-Jomart Toqaev atap ótkendeı, biz erjúrek aǵa býynnyń aldynda máńgi qaryzdarmyz. Olardyń qaısarlyǵy men tózimdiliginiń, tabandylyǵy men patrıottyǵynyń arqasynda beıbit zamanda ómir súrip, jarqyn bolashaǵymyzǵa jol ashtyq, - dedi saltanatty jıynda sóz alǵan Oral qalasynyń ákimi Abat Shynybekov.
Qala ákimi atap ótkendeı, memleket ardagerlerdi qoldaý úshin barlyq jaǵdaıdy jasaýda. Uly Jeńistiń 75 jyldyǵy qarsańynda Oral qalasyndaǵy 48 soǵys ardageri 1 mıllıon teńge kóleminde materıaldyq kómek aldy. Konslager tutqynynda bolǵandar men Lenıngradty qorǵaýshylarǵa 120 myń teńgeden, tyl ardagerleri men ardagerler jesirlerine 30 teńgeden kómek kórsetildi.
Jeńistiń 75 jyldyq merekesine oraı qalamyzdaǵy eń kórikti meken - «Jeńis alańy» qaıtadan jańartyldy, «Dańq memorıaly» batysqazaqstandyq sarbazdardyń esimderi men fotolarymen jańadan bezendirildi. Uly Jeńiske zor úles qosyp, jaýǵa atylǵan 10 oqtyń toǵyzyn daıyndaǵan tyl ardagerleriniń qurmetine «Tyl eńbekkerlerine taǵzym» barelefi ornatyldy. Alleıalarǵa batysqazaqstandyq jaýyngerlerdiń qosqan úlesi týraly aqparattyq taqtalar qoıyldy, soǵystyń negizgi oqıǵalary men kezeńderin beıneleıtin sýretter, mańyzdy datalar engizildi. Elimizdegi tótenshe jaǵdaı rejımi men karantın tártibine baılanysty Jeńistiń 75 jyldyq merekesine arnalǵan is-sharalardyń kóbi qashyqtan, onlaın formatta uıymdastyrylyp jatyr, - dedi qala ákimi.
Iá, jyl ótken saıyn sol bir qandy qyrǵynnyń kýágerleri, jeńis sarbazdary azaıyp barady. Batys Qazaqstan oblysynda nebári 62 ardager qalypty. Qatary seldirep qalǵan qarýlastarynyń atynan búgin alańǵa kelgen Hamza Safın, Ivan Gapıch, tyl ardageri Merýert Joldyqaıyrqyzy búgingi saltanatty óz kózderimen kórgeni úshin baqytty ekenin aıtty.
Osydan dál 75 jyl buryn oblystyq radıonyń efırinen jeńis habaryn jarııalaǵanym esimde. «Tyńdańyzdar, tyńdańyzdar! Oraldan sóılep turmyz! Búgin halqymyzdyń ańsap kútken uly jeńis kúni! Fashıstik Germanııanyń basqynshy armııasyn Sovettik Qyzyl armııanyń soldattary óz jerinde, óz topyraǵynda, óz úńgirinde máńgilik basyn kótermesteı etip jeńdi! Búgin Uly jeńis kúni! Qýanyńdar! Shattanyńdar!» - dep júregimiz jaryla habarlaǵan súıinshi jańalyqqa 75 jyl ótipti. Bul kún aǵa urpaqtyń janqııarlyq isin el jadynda saqtap qalýǵa arnalǵan eń qasterli mereke. Búgingi Táýelsizdik baıandy bolsyn, elimiz búgingi indetti de jeńip, ár otbasy baqytty bolsyn, - dedi Merýert Joldyqaıyrqyzy.
Budan keıin ardagerler, jınalǵan halyq qan maıdanda qaza tapqan bozdaqtardyń rýhyna bir mınýt únsiz turyp qurmet kórsetip, máńgilik alaý basyna gúl shoqtaryn qoıdy. Ardagerler arnaıy daıyndalǵan elektromobılge otyryp, alańdaǵy jańa ózgeristermen tanysty. Gıd rólinde qala ákimi Abat Abaıulynyń ózi júrdi.
Budan keıin ardagerlerdiń bir tobyn oblys ákimi Ǵalı Esqalıev qabyldap, qurmet kórsetti. Oǵan qosa Oral qalasynda turatyn ár ardagerdiń úıine arnaıy kólik attandy. Karantın jaǵdaıyna baılanysty olardyń árqaısysynyń úıi janynda shaǵyn konsert qoıylyp, merekelik syı-sııapat berilmek.
Buǵan qosa jergilikti sport mektepteriniń oqýshylary Jeńistiń 75 jyldyǵy qurmetine oblys ortalyǵynyń kóshelerimen velosherý jasap júrip ótti.
Batys Qazaqstan