Taýarlar jáne kórsetiletin qyzmetterdiń sapasy men qaýipsizdigin baqylaý departamentiniń mamandary jyl saıyn kún ysyp, kene shyǵysymen qaýipti jándikterdiń qandaı aýrýlardy taratýy múmkin ekenin tekserip, arnaıy zerthanalyq saraptama arqyly kene ensefalıti táýekeliniń bar-joǵyn anyqtaıdy.
- Bizdiń mamandar kenege ádette mamyr-maýsym aılarynda monıtorıng júrgizedi. О́ıtkeni bul kezeńde jándikterdiń belsendiligi arta túsedi. Tolyqqandy zertteý júrgizý úshin mamandar kem degende 500 jándik ustaıdy. Jylda kóktem shyǵa balalardyń jazǵy demalys oryndaryna, qala turǵyndary shoǵyrlanatyn saıabaq, jaǵajaı mańdaryna kenege qarsy zalalsyzdandyrý jumystaryn júrgizetin edik. Bıyl karantınge baılanysty bul jumys atqarylǵan joq. Biraq aýyldyq jerderde turatyn malshylary, orman sharýashylyǵy jumysshylary men vahtalyq kezekpen jumys istep júrgenderge josparly túrde kene ensefalıtine qarsy egý sharalary júrgiziledi, - dedi epıdemıologııalyq baqylaý bóliminiń bas mamany Irına Antonova.
Bas mamannyń aıtýynsha, aımaqta sońǵy 10-15 kún ishinde 35 adamdy kene shaqqan. Dáriger kómegine júgingenderdiń jartysyna jýyǵy 14 jasqa deıingi balalar. Kene shaǵyp dáriger kómegine júgingender arasynda, qazirshe, ensefalıt anyqtalmaǵan. Degenmen mamandar turǵyndardy asa abaı bolýǵa shaqyrady. Kene shaqqan adam dereý dárigerge qaralmasa, asqynǵan aýrý daýasyz dertke ulasýy múmkin.
Qostanaı oblysy