Búgin, qyrkúıektiń 24-i kúni tańerteń Almaty qalasynda Keńes Odaǵynyń Batyry, «Halyq qaharmany», táýelsiz Qazaqstannyń tuńǵysh Qorǵanys mınıstri Saǵadat Nurmaǵambetov dúnıeden ótti.
Saǵadat Qojahmetuly 1924 jyldyń 25 mamyrynda Aqmola oblysynyń Eńbek aýylynda týǵan. 1942 jyly Qyzyl ásker qataryna alynyp, Túrkimenstandaǵy áskerı ýchılıshege bilim alýǵa joldamamen jiberiledi. Oqýdy aıaqtaǵan 1943 jyly Uly Otan soǵysyna qatysyp, pýlemetshiler vzvodynyń komandıri retinde jaýmen shaıqasady. Soǵys aıaqtalysymen 1946 jyly M.I. Frýnze atyndaǵy Áskerı akademııaǵa túsip, ony 1949 jyly támamdaǵan. Al 1950-1989 jyldary Azamattyq qorǵanys shtabynyń bastyǵy, Orta Azııa áskerı okrýgi áskerleri bastyǵynyń orynbasary, Ońtústik ásker toby (Vengrııa) bastyǵynyń birinshi orynbasary boldy. 1990 jyldan soǵys, eńbek jáne Qarýly kúshteri ardagerleri keńesiniń tóraǵasy, 1992-1995 jyldary Qorǵanys mınıstri, al 1996 jyly Prezıdent keńesshisi qyzmetin atqardy. 1994 jyldyń 23 mamyrynda Memleket basshysynyń Jarlyǵymen Saǵadat Qojahmetulyna «Halyq qaharmany» ataǵy berilip, elimizde alǵashqy bolyp «Altyn juldyz» ordenin ıelendi. Al1971-1994 jyldary Joǵary keńeske birneshe márte halyq qalaýlysy bolyp saılanǵan.
Esimi tarıhymyzǵa altyn árippen jazylǵan Saǵadat Qojahmetulyn Bolgarııa, Polsha, Chehııa, Monǵolııa syndy birneshe elder de nagradamen marapattady.