Teriskeı qurylys alańyna aınalady

Jalǵyz bul baǵdarlama emes «Nurly jol», «Nurly jer», «Aýyl – el besigi» baǵdar­lama­la­ry­nyń oryndalýyn qosa alǵan­da bıyl 187 túrli qurylys jumy­syn iske asyrý kózdelip otyr. Oblystyq bıýdjettiń shyǵys bóligin naqtylaý barysynda oǵan 300 mlrd teńge qarajat bólinetin boldy.

Áleýmettik nysandar qury­lysy qatarynda bıyl 100 mektepke jóndeý jumystary júr­giziledi. Petropavldyń Bereke sha­ǵyn aýdanynda zaman talaptaryna saı keletin emhana sa­lynbaq. Mádenıet salasynyń 32 nysany kúrdeli jáne aǵymdyq jóndeýlerden ótkiziledi.

Osyǵan baılanysty Qumar Irgebaıuly erekshe pikir bildirdi. «Buryn biz dańǵaradaı mádenıet úılerin turǵyzyp, olardy tek konsert kórýge, jınalys ótkizýge ǵana qoldanyp keldik. Basqa ýaqyttarda tek oryndyqtardan turatyn olar jaryq, jylý, kúzet shyǵyndaryn bosqa shyǵaryp, qańyrap turatyn. Mine, osyndaı qurylystardy qazir sporttyq sharalar ótkizýge de beıimdeý kerek. Olardyń ishine trenajerler ornatyp, fıtnes klýbtar uıymdastyrýǵa bolady. Sonda mádenıet úıleri tıimdi paıdalanylady», dedi ol.

Sonymen birge bıyl 777 shaqyrym jol jóndeletindigi belgili boldy. 76 eldi mekenge taza aýyz sý jetkizý máselesi she­­shiledi. Osyǵan baılanysty ja­ńadan 6400 jumys oryndaryn ashady.

Sonymen birge ákim nysandar qurylysynyń jobasyn iske asyrý konkýrsyna túse­tin úmitkerlerge talaptyń kúsheıe­tinin jetkizdi. Árbir kompanııa alystan keletin jumyskerlerge 85 myń teńge qonystaný qara­ja­tyn tóleýge mindetteletin bolǵan.

Sonymen birge ákim sýbmer­digerlik degen bolmaıtynyn atap aıtty. «Konkýrsty jeńip alǵannan keıin árbir kompanııa 3 kúnniń ishinde júrgiziletin jumystyń syzbasyn jasaýy kerek. Al onyń oryndalýyn ha­lyq arasynan shaqyrylǵan bel­sendi azamattar, jýrnalıs­ter men blogerlerden, qoǵamdyq uıymdar ókilderinen quralatyn komıssııa qadaǵalap otyrady. Syzbadan aýytqyǵan jaǵdaıda biz kelisimshartty birden územiz», dedi Q.Aqsaqalov.

Sonymen birge ákim qury­lysqa 90 paıyzdyq otandyq qu­rylys materıaldary qoldanýy kerektigin aıtty. Sonyń ishinde oblys aýmaǵyndaǵy qurylys materıaldaryn óndiretin kásip­oryndar da bar. «Alaıda osy talapty paıdalanyp, kásiporyndar óz ónimderiniń baǵasyn ósirip jibermeýi qadaǵalansyn», dedi ákim.

Sóıtip teristikte bıyl qury­lys qarqyndy júrgizilmek. Ka­ran­tın rejimin saqtaýda oblys aldyńǵy qatardaǵy aımaqtar qa­tarynan tabylyp, indettiń óris­teýine jol bermegen edi. En­di qu­rylysty da sol qarqynmen at­q­arsa quba-qup.

Soltústik Qazaqstan oblysy