Batys Qazaqstan oblysynyń Aqsaı qalasyndaǵy «Qazburgaz» aksıonerlik qoǵamy Bórli aýdandyq aýrýhanasyna sý jańa jedel járdem kóligin syılady. Kompanııanyń vıse-prezıdenti B.Dúısenov bas dáriger mindetin atqarýshy Shyńǵys Sársenǵalıevke kólik kiltin saltanatty túrde tabystady.
Iri óndiris oryndary shoǵyrlanǵan Bórli aýdanyndaǵy aýrýhanada buǵan deıin 19 jedel járdem kóligi bar edi. Biraq olardyń deni tozyp tur. Oblystyq densaýlyq saqtaý basqarmasy tarapynan aýdandyq aýrýhananyń avtoparki jyl saıyn eki jedel járdem kóligimen tolyǵyp keledi. Degenmen, halyq sany kún sanap artyp kele jatqan Aqsaı qalasynyń ózinde jedel járdem kóligi tapshy. Sondyqtan da aýdan basshylyǵy halyq densaýlyǵyn qorǵaý, aýdandyq aýrýhananyń materıaldyq-tehnıkalyq bazasyn kúsheıtý maqsatynda júıeli jumys jasalyp keledi.
Adamdardyń ómiri, halyq densaýlyǵy – bizdiń eń basty qazynamyz. Memleket basshylyǵy tarapynan da bul máselege erekshe mán beriledi. Bıylǵy jyldyń sońyna deıin aýdandyq aýrýhanada tozyǵy jetken qural-jabdyqtar túgelimen aýystyrylatyn bolady. Halyq densaýlyǵyn nyǵaıtý, qaýipti jaǵdaılardy boldyrmaý baǵytynda birlese atqarǵan jumysy úshin jergilikti kompanııa basshylaryna alǵys aıtamyn, - dedi saltanatty sharaǵa qatysqan Bórli aýdanynyń ákimi Mırjan Satqanov.
Ramazan aıynda jomarttyq kórsetip, qaıyrymdy is jasaǵan «Qazburgaz» kompanııasy óńirdiń ónerkásibin alǵa súırep, munaı-gaz salasynda óz ornyn tapqan kásiporyn. Munaı jáne gaz uńǵymalaryn qurastyrý, synaqtan ótkizý, burǵylaý júrgizýmen aınalysatyn bul kompanııanyń jaqsy isin jalǵastyratyn óndiris oryndary az emes eken. Máselen, aýdandaǵy eń iri Qarashyǵanaq Petroleým Opereıtıng b.v. kompanııasy da aýdandyq aýrýhanaǵa «Perseus A500» jáne «Fabius Plus» (jasandy tynys aldyrý fýnksııasy bar narkoz apparattary) kompressorlarymen birge úsh anestezıologııalyq jumys stansııasyn syıǵa berdi. Buǵan qosa kompanııa osy aıdyń sońyna deıin aýdandyq aýrýhanaǵa taǵy eki jedel járdem kóligin syılamaq.
Batys Qazaqstan