Memleket basshysynyń bastamasymen qolǵa alynǵan Volonter jyly aıasynda aımaqta túrli baǵytta tolymdy jumys bar. Jyl basynda «Volonter jylyn ótkizý jónindegi is-sharalar josparyn bekitý týraly» el Úkimetiniń 2020 jylǵy 16 qańtardaǵy №3 qaýlysyn iske asyrý maqsatynda aımaqtyq is-sharalar jospary daıyndalyp, óńirlik sarapshylar keńesinde talqylandy. Oblystyq «Jastar resýrstyq ortalyǵy» janynan shtab quryldy.
Quramyna jastar, úkimettik emes uıym, joǵary jáne tehnıkalyq-kásiptik bilim berý oryndary ókilderi men qoǵam belsendileri, quqyq qorǵaý, tótenshe jaǵdaılar qyzmeti ókilderi engen shtab otyrysy aıyna 1 márte ótkiziledi. Oblysta qazir volonter qataryndaǵy jastardyń sany 10 myńnan asady. Odan bólek úkimettik emes uıymdar, qoǵamdyq birlestikter ókilderi de volonterler bastamasyna barynsha úles qosyp keledi.
Jyldyń alǵashqy eki aıynda ataýly jyl aıasyndaǵy sharalar birneshe baǵytta iske asty. Mysaly, «Saýlyq» baǵyty boıynsha oblystyq jastar densaýlyǵy ortalyǵynda 48 semınar ótkizilip, oǵan qatysqandardyń arasynan 114 volonter 53 trenıng uıymdastyrdy. Oblystyq jastar densaýlyǵy ortalyǵyndaǵy eriktiler búginde halyqaralyq Y-Peer jelisine qosylyp, Bolgarııa men Belarýs elderi mamandarynyń adam saýlyǵyn qorǵaý baǵytyndaǵy oqýlarynan ótken.
Syr volonterleri jyl basynan ár aptanyń senbi kúni tótenshe jaǵdaılar departamenti qyzmetkerlerimen birlesip turǵyndarǵa turmystaǵy órt qaýipsizdigi talaptaryn túsindirý jumystaryn júrgizýde. Bıylǵy jylý berý maýsymynda kópbalaly otbasylar turatyn turǵyn úı sektorynda kómirqyshqyl jáne tabıǵı gazdy anyqtaıtyn 3 838 qondyrǵy satyp alyndy. Qazir departament qyzmetkerleri men «Volontery Kyzylordy» QQ eriktileri osyndaı 73 qondyrǵy ornatty.
«Qaýipsiz qala» reıd-aksııasy barysynda volonterler qatysýymen qala, aýdan kóshelerinde ashyq jatqan qudyqtar tekserildi. Eriktilerdiń eskertýimen mektepter aınalasyndaǵy ashyq jatqan qudyqtar qaqpaqtary jabyldy. «Qamqor» baǵyty boıynsha volonterler 22 qarttyń úıin tazalap berdi, olardyń qatarynda soǵys jáne tyl ardagerleri, jalǵyz basty qarııalar bar.
«Sabaqtastyq», «Taza álem», «Úmit», «Bilim», «Asyl mura» men «Quqyqtyq keńes berý» baǵyttarynda da ondaǵan shara ótkizilip, volonterler bastamasy el kóńilinen shyqty.
Koronavırýs indetine baılanysty elimizde engizilgen tótenshe jaǵdaı rejimin saqtaýdy nasıhattaý, tártiptiń baqylaýyn qadaǵalaıtyn polısııa qyzmetkerleri men dárigerlerdi qoldaý sharalaryna da volonterler qosqan úles kóp. Tótenshe jaǵdaı jarııalanǵannan keıin oblys kóleminde 136 onlaın shara uıymdastyrylyp, Syr volonterleri qysyltaıań shaqta turǵyndarǵa qol ushyn sozdy. Olar oblys kóleminde turǵyndarǵa 41736 dana betperde, 10 000-nan astam únparaq pen 1000-nan astam antıseptıkalyq qural taratty. Azyq-túlik taýarlarymen qamtamasyz etýge de úles qosyp, tosqaýyl beketterinde jumys jasap jatqan medısına, polısııa, áskerı sala qyzmetkerlerine kómek uıymdastyrdy. Osy baǵytta Jalaǵash, Shıeli, Aral, Syrdarııa aýdany eriktileriniń eńbegi erekshe. Oblys volonterleri arqasynda sáýir aıynda 4466 otbasyna azyq-túlik taratylyp, jomart jandar 200 medısınalyq test alyp berdi.
Jańaqorǵan aýdany volonterleri úshinshi jyl qatarynan turmysy tómen otbasylaryna úı salyp berýdi jalǵastyryp keledi. Qınalǵanǵa qamqor bolǵandar kómegimen alǵashqy jyly jalǵyz basty ana Aqzıla Isamametova baspanaly bolsa, byltyr jańa turǵyn úı kilti ekinshi top múgedegi Anar Belasarovaǵa tabystaldy. Jaqynda ǵana «Jańarǵan Jańaqorǵan jastary» volonterleri kópshilik qoldaýymen taǵy bir úıdiń qurylysyn bastady.
Dál osyndaı bastama Qazaly aýdanynda da qolǵa alyndy. Tolassyz jaýǵan jańbyrdan eski baspanasy jaramsyz bolyp qalǵan kópbalaly otbasyna aýdan kásipkerleri qarjylaı kómek berip, erikti jastar úı salýdy bastap ketti.
Jastar resýrstyq ortalyqtary arqyly volonterlik negizdegi jumystardy qashyqtan júzege asyrýdyń jospary túzilip, kórkemsóz oqý vıdeo-baıqaýy, qashyqtan oqytatyn «Qoljetimdi aǵylshyn» jobasy iske qosyldy. Elektrondy oqýlyq platformalary arqyly «UBT-ǵa daıyndyq sheberlik sabaqtary», «Matematıka onlaın», «Sport onlaın» jumystary bastalyp ketti. Sonymen qatar «Bilim» baǵyty boıynsha úzdik ustazdar arasynan erikti túrde onlaın-rejimde sabaq berýge kelisken oqytýshylarǵa barlyq múmkindikter qarastyryldy.
QYZYLORDA