«Tank maketiniń uzyndyǵy – 30 sm, bıiktigi – 15 sm, eni – 17 sm. Qaldyq materıaldar, temir jınadym. Dóńgelekteri moıyntirekten, al tabanyna «Jıgýlı» avtokóliginiń shynjyryn qoldandym. Munarasyndaǵy qańyltyr 360 gradýsqa burylady. Zeńbiregi, tartatyn arqany, kúrek, arasy, jaryqsham, bak jáne taǵy basqa bólshekteri sýretten kórinedi», deıdi Azamat Súleımenov.
«Erlik – elge mura, urpaqqa uran». Ekinshi dúnıejúzilik soǵystyń aıaqtalýynyń 75 jyldyǵyna oraı ol ózi jasaǵan tank jobasyn jerles batyr Ábilqaıyr Baımoldınniń rýhyna arnaǵan eken.
Jaýynger Ábilqaıyr Baımoldın Taqyr aýylynda týǵan. 1944 jyldyń qańtarynda Nevel qalasyn jaýdan qorǵap, erlikpen qaza tapty. Baımoldın basqarǵan vzvod qatarynda Mánshúk Mámetova bolǵan. Neveldi jaýdan bosatqan soń, Á.Baımoldın qala komendanty bolyp taǵaıyndalady.
Azamat batyrǵa arnaǵan tank maketin jasaýda árbir bólshegine erekshe kóńil bólipti.
– Máńgilik ot temir qańyltyrdan 1 mm kesilip dánekerlendi. Ottyń ózi de temirden jáne beınesi beıbitshilik qusy kógershinge uqsas jasaldy, – deıdi ol.
Tank ornalasqan temir tuǵyrdyń aınalasyndaǵy máńgilik ottyń janynda eki qalampyr gúli juqa qańyltyrdan, shóp qaǵazdan kesilip, jasyl túske jelimdelgen. Qorshaýy shaǵyn shegemen dánekerlenip, sary jibek jippen ilingen.
Al Azamat aýyldaǵy Taqyr negizgi bilim berý mektebiniń tehnologııa pániniń muǵalimi. Mamandyǵy ınjener-pedagog, fızık-ınformatık. Aýyl mektebinde 17 jyldan beri qyzmet etip keledi. Shaǵyn jınaqty aýyl mektebinde 39 oqýshy ǵana qalypty.
Tótenshe jaǵdaı ýaqytyna deıin oqýshylarymen birge túrli jobalar qurastyratyn. Olarǵa da qyzyqty, ózderi de izdenip, túrli buıymdar, zat jasaıdy. Áskerı tehnıkalardyń maketin jasaý – oqýshylardy mektep bitirgen soń, Otan qorǵaýǵa, ásker qataryna barýǵa qyzyqtyrady, patrıottyq tárbıe beredi.
Jýyrda aýdandyq bilim bóliminiń qashyqtan jarııalaǵan baıqaýy barysynda Azamat Súleımenovtiń jasaǵan tank jobasy 1-oryn aldy.
Pavlodar oblysy,
Aqqýly aýdany