Qaýipti indetti juqtyrǵandar arasynda júkti kelinshekter de bar. Keshe solardyń ekeýi sábılerin aman-esen dúnıege ákeldi.
Oblystyq densaýlyq saqtaý basqarmasy baspasóz qyzmetiniń habarlaýynsha, júkti analardy bosandyrý prosesine №2 oblystyq aýrýhanasynyń bilikti hırýrgtary men anestezıolog mamandary, sondaı-aq, oblystyq perınataldyq ortalyqtyń dáriger-reanımatologtary, gınekologtary, akýsherler quramy men neonatologtary qatysypty. Jıyrma toǵyz jastaǵy kelinshek kesar tiligi arqyly qyzdy boldy. Sábıiniń salmaǵy – 3,620 keli, boıy –53 sm. Al, 24 jastaǵy áıel salmaǵy 4,270 kelini, boıy 56 sm-di quraǵan uldy ómirge ákeldi.
– Júkti áıelder ınfeksııalyq stasıonarǵa júktiliktiń 38 aptasynda qabyldanǵan edi. Olarda koronavırýs ınfeksııasynyń sımptomsyz jaǵdaıy rastalǵan bolatyn. Bosanǵan analar juqpaly aýrýlar bólimshesinde hattamaǵa sáıkes emin jalǵastyratyn bolady. Náresteler analarynan oqshaýlanyp, arnaıy ázirlengen taza palataǵa aýystyryldy. Jaǵdaıy qanaǵattanarlyq, dárigerlerdiń baqylaýynda, - deıdi №2 oblystyq aýrýhana dırektorynyń orynbasary Nadıa Erǵalıeva.