Aldaǵy ýaqytta Turǵyn úı qurylys jınaq banki «Nurly jer» baǵdarlamasynyń jańa baǵyty retinde «5-10-20» pılot jobasyn iske qosady. Atalǵan ıpotekalyq baǵdarlamaǵa turǵyn úıge muqtaj retinde jergilikti atqarýshy organdarda esepte turǵan azamattar qatysa alady.
Prezıdent Qasym-Jomart Toqaevtyń tapsyrmasy boıynsha iske qosylatyn jańa jobanyń sharttary qoljetimdi. Nesıe mólsherlemesi 5%-dy quraıtyn, bastapqy tólenetin jarna 10% bolatyn nesıelendirý merzimi 20 jylǵa arnalǵan ıpotekalyq baǵdarlamaǵa turǵyn úı kezeginde turǵan baspanaǵa muqtaj azamattar qatysa alady. Baspanany «Nurly jer» baǵdarlamasynyń aıasynda salynǵan jańa turǵyn úı keshenderinen, jeke qurylys salýshylardan da satyp alýǵa bolady.
Turǵyn úı qurylys jınaq banki baspasóz qyzmeti taratqan málimet boıynsha qazirgi ýaqytta atalǵan baǵdarlama daıyndyq ústinde. Dese de, aldyn ala málimet boıynsha baspana quny Nur-Sultan, Almaty jáne osy qalalardyń mańyndaǵy aımaqtar úshin 18 mln aspaıdy. Atyraý, Aqtaý, Aqtóbe, Túrkistan jáne Qaraǵandy oblystary, sondaı-aq Shymkent qalasy úshin 15 mln teńge bolsa, basqa aımaqtar úshin 12 mln teńgeden aspaýy tıis.
Sonymen qatar, ákimdik tarapynan salynǵan baspanalar 1 sharshy metri úshin Almaty qalasynda 240 myń teńgege deıin, Nur-Sultanda jáne osy qala mańyndaǵy aımaqtarda 220 myń teńgege deıin, Shymkent qalasynda jáne Almaty mańyndaǵy aımaqta 200 myń teńgege deıin, Aqtóbe, Atyraý, Aqtaý, Túrkistan jáne Qaraǵandy oblystarynda 180 myń teńgege deıin, basqa aıtmaqtar boıynsha 160 myń teńgege deıingi meje bekitilgen.
Sonymen qatar, turǵyn úıge kezekte turǵandardyń tizimi buǵan deıin ákimdikterde bolsa, endi bul quziretti jańadan qurylatyn «Otbasy bankine» berý josparlanyp otyr.
– О́z kezeginde «Otbasy banki» baspanasy joq januıalar úshin «bir tereze» qaǵıdaty boıynsha qyzmet usynatyn bolady, – dep atap ótti Turǵyn úı qurylys jınaq banki basqarma tóraıymy Lázzat Ibragımova.
Jyl basyndaǵy tirkelgen málimet boıynsha jergilikti atqarýshy organdarda 540 myńnan astam adam úı kezeginde tur. Onyń ishinde 212,5 myń adam memlekettik qyzmetker, bıýdjettik uıymdarda jumys isteıtinder retinde tirkelgen. Tizimdegi tolyq emes otbasylar 120,5 myń adam, ata-anasyz qalǵan 60,8 myń bala, 1 jáne 2-toptaǵy múgedekter 43,5 myń adam, múmkindigi shekteýli bala tárbıelep otyrǵan otbasylar 21,1 myń adam, zeınetkerler – 18 myń adam, basqa sanattar boıynsha 16 myń adam tirkelip otyr.