О́tken jyly Áýlıeata jerinde birqatar mádenı nysandar ashylyp, kóptiń ıgiligine paıdalanýǵa berilgen edi. Bul jumystar bıyl da jalǵasyn tabatyn bolady. Kóne mekende kóptiń kókeıinde júrgen jobalardyń jandanar kúni jaqyn.
Máselen, «Aýyl – el besigi» jáne «Jumyspen qamtýdyń jol kartasy» baǵdarlamalary aıasynda alty jańa aýyldyq mádenıet úıi men klýbtar ashylyp, eki aýyldyq klýb pen kitaphana jóndeýden ótedi. Sonymen qatar, Sh.Ýálıhanov atyndaǵy oblystyq ámbebap-ǵylymı kitaphanasy aǵymdaǵy jóndeýden ótse, Baızaq aýdandyq memlekettik muraǵaty abattandyrylady.
Kóne Taraz qalasyndaǵy «Qarahan» jáne «Tekturmas» etno-tarıhı keshenderi de qalpyna keltiriledi. Jambyl oblysynyń ákimi Berdibek Saparbaev atalǵan máselege baǵyttalǵan josparly jumystar barysymen tanysty. Qazirgi tańda mundaı nysandar elimizdiń túkpir-túkpirinen keletin týrıster úshin de, sheteldikter úshin de qasıetti oryn bolyp sanalady. Keleshekte munda tıisti ınfraqurylym tartylyp, qaıta jańǵyrtý sharalary atqarylady. Nátıjesinde «Aısha bıbi» kesenesi men «Kóne Taraz» kesheni óńirde týrızmdi damytýdyń lokomotıvine aınalady dep kútilýde. Búginde «Qarahan» kesheninde de aýmaqty abattandyrý jumystary júrgizilýde. Munda ekspozısııa zaly jumys isteıdi. Qazirgi kezde «Qarahan» jáne «Kóne Taraz» keshenderin qosatyn jaıaý júrginshiler aımaǵyn qamtıtyn skver salý jobasy iske asyrylýda. Bul rette Taraz qalasynyń ákimdigi memlekettik qajettilikter úshin bes jeke úıdi satyp alý máselesin qarastyrýda. Sonymen qatar, Berdibek Saparbaev qalada kógaldar men gúlzarlardy otyrǵyzyp, Baızaq batyr kóshesi jaǵynan Qarahan kesenesiniń panoramalyq kórinisin ashýdy, ol jaqtan da jeke kireberis salýdy usynǵan bolatyn.
О́tken jyly «Tekturmas» etno-tarıhı kesheni qaıta jandanyp, onda Áýlıeatanyń alyp eskertkishi ornatylǵan edi. Alaıda, jobany tolyq aıaqtaý úshin ol jerge kópesterdiń dúkenderi bar ortaǵasyrlyq bekinis turǵyzyp, sarqyrama, jaǵalaýdy jaılastyrý, keshen men keseneniń arasyna jaıaý júrginshiler alleıasyn salý, Ańyraqaı jáne Atlah shaıqastary beınelengen barelefti qabyrǵa ornatý jumystary júrgizilýi kerektigi de aıtylýda. Al, aspaly jol salý máselesi keshen tolyǵymen aıaqtalǵannan keıin qaralady. Aldaǵy ýaqyttarda mundaı tarıhı keshender Áýlıeata óńirinde týrızmdi damytýǵa ózindik úlesin qosatyn bolady.
Jambyl oblysy