Jeńistiń 75 jyldyǵyna oraı Ulttyq akademııalyq kitaphananyń uıymdastyrýymen «Jeńiske taǵzym» atty halyqaralyq onlaın-kezdesý ótti.
Ekinshi dúnıejúzilik soǵysta erlikpen qaza tapqan maıdangerlerdi eske alyp, óskeleń urpaqty rýhanı, adamgershilik jáne patrıottyq rýhta tárbıeleýdiń negizgi faktorlary retinde qoǵamdyq tatýlyqqa erekshe mán berýdi maqsat tutqan onlaın-marafon Ulttyq akademııalyq kitaphananyń basshysy Úmithan Muńalbaevanyń moderatorlyǵymen ótti.
– Bizdiń halqymyzdyń maıdandaǵy orasan zor kúsh-jigeriniń, tyldaǵy erlikteriniń arqasynda Uly Jeńis kúnine jetti. Qazaqstan halqynyń da osy bir ómirdiń qatal emtıhanyna tótep bergenin maqtan tuta aıta alamyz. Bul soǵysqa bir jarym mıllıon qazaqstandyq qatysty. Adamdardyń júreginde Otan qorǵaýshylarǵa degen qurmet árqashan ómir súrýi kerek, – dep sóz bastaǵan jıyn moderatory sum soǵystyń ult tarıhyndaǵy mańyzyna toqtaldy.
Onlaın-kezdesýge qatysqan Reseı memlekettik kitaphanasynyń brend-menedjeri Natalıa Shkýdnova 75 jyldyqtyń qarsańynda jasalyp jatqan jumystarymen bólisip:
– Uly Jeńistiń 75 jyldyǵyna oraı «Kitaphana túni. Bizdiń jeńisimizdiń esteligi» atty jobany qolǵa aldyq. Bul jobaǵa qazaqstandyqtar da qatysty. Árbir qatysýshy Uly Otan soǵysy taqyrybynda shyǵarmalar oqyp, beınerolıkterin áleýmettik jelilerde jarııalady. 4000-nan astam kitaphanadan ártúrli jumystar kelip tústi. Jalpy, onlaın-marafonǵa 40 000-nan astam adam qatysty. Sondaı-aq óleń oqyp joldaǵan balalar da boldy, – dedi.
Tarıhy tereńnen tamyr tartatyn Ulttyq kitaphana qyzmetkerleriniń basym bóligi maıdanǵa attanypty. Atap aıtsaq, aǵaıyndy Ahmetovter, Ivan Vandarenko, Vladımır Mahavıkov, kitaphana dırektory Muhtar Janǵalın bar. Barlyǵy 20 adam bolǵan: onyń ishinde 10-y qyz bala. Bul týraly Ulttyq kitaphana dırektory Baqytjamal Ospanova aıtty. Sondaı-aq:
– Soǵys jyldarynda bizdiń kitaphananyń oqý zalynda Tolstoı, Ýspenskıı, Abrıkosov, Cherkasovtar jumys istegen. Bul kisiler Keńes Odaǵynyń erekshe talantty, shyǵarmashyl tulǵalary bolatyn. Almatyda «Ivan Groznyı» fılmi túsirilgeni jóninde Ulttyq kitaphananyń sırek kitaptar jáne qoljazbalar bóliminde Eızenshteınniń fılm túsiriliminen soń túsken 8 sýret salǵan dápteri saqtaýly tur. Munda ártisterdiń kıimi qalaı bolýy kerektigi jazylǵan. Bul dápterlerdi sol kezde rejısserden kitaphana dırektory 1300 rýblge satyp alǵan eken, – dep sózin jalǵady.
Shyǵys Qazaqstan oblysynyń 109 turǵyny Keńes Odaǵynyń Batyry ataǵyn alǵany týraly baıandaǵan A.Pýshkın atyndaǵy Shyǵys Qazaqstan oblystyq kitaphananyń dırektory Bıbigúl Shagıeva:
– Keıingi ólketanýshylar buryn kóterilmegen taqyryptar aıasynda zertteý jumystaryn júrgizip jatyr. Uly Otan soǵysyna qatysqan árbir batyr týraly bıblıografııalyq zertteý jınaqtalýda. Bul bazada zertteý jumystary júrgizilip, tyń aqparattarmen tolyqtyrylýda. Soǵysqa jiberilgen 10 oq-dáriniń 9-y О́skemen qalasyndaǵy zaýyttardan shyǵarylǵan. Batyrlarymyzdyń analary, jubaılary, tipti balalary da bir kisideı jumylyp, egin alqaptarynda, jumysshy kúshin qajet etilgen óndiris oryndarynda qyzmet etken, – dep oı tarqatty.
Kezdesý barysynda UAK qorlaryndaǵy soǵys týraly kitaptar men soǵys jyldaryndaǵy kitaphanalardyń tarıhy týraly qyzyqty derekter qamtylyp, arnaıy kórme uıymdastyryldy. Shara sońynda onlaın qatysýshy qonaqtar «Tyrnalar» ánin birge shyrqady.