Jańa sıfrlyq jobalar pánderdi jaqsy túsinýge jáne oqýshylardyń bilim júıesine degen qyzyǵýshylyǵyn arttyrýǵa kómektesedi, dep habarlady elorda ákimdiginiń baspasóz qyzmeti.
Oqý oryndarynda bilim alýshylardyń sıfrlyq saýattylyǵyn arttyrý maqsatynda «Okoo onlaın-platformasy», «Sıfrlyq oqýlyqtar» jáne «Sıfrlyq mektep» pılottyq jobalary júzege asýda.
Okoo onlaın bilim berý platformasy – «Informatıka» pánin oqytýǵa arnalǵan jasandy ıntellekt algorıtmderi. Vırtýaldy oqytýshysy bar, baǵdarlamalaýdy úıretip, barlyq adamǵa derbes múmkindik beretin platforma táýlik boıy álemniń kez kelgen núktesinde qoljetimdi. Biriktirilgen reıtıng júıesi arqyly oqýshylardyń reıtıngin obektıvti túrde anyqtaýǵa bolady. Joba qalanyń 13 mektebinde júzege asýda. Okoo platformasy 7–10 synyp oqýshylaryna Python tilinde baǵdarlamalaýdy úırenýge kómektesedi. Búgingi tańda platformaǵa 6015 oqýshy tirkelgen. «Okoo: onlaın baǵdarlamalaý mektebi» jobasy aıasynda qalanyń 13 mektebinen 86 ınformatıka muǵalimi oqytyldy. Trenıngke úsh bilim berý kýrsy kiredi: «Python tilinde baǵdarlamalaýǵa kirispe», «Grafıkalyq dızaın», «IT startap kýrsy».
«Sıfrlyq oqýlyqtar» pılottyq jobasyna tórt mektep qatysady. Bul jobada oqýlyqtardyń sandyq nusqasy opiq.kz saıtyna engizilip, «Almatykitap» baspasymen, estonııalyq Avita baspasymen jáne Star Cloud IT-kompanııasymen (QR BǴM jobasy) birlesip ázirlengen.
Jobanyń maqsaty – elektrondy bilim berý kontenti men zamanaýı pedagogıkalyq tehnologııalar esebinen bilim berý úderisinde elektrondy oqýlyqtardy tıimdi paıdalaný jáne oqýshylardy oqytý sapasyn basqarý júıesin qurý. Mekteptiń aqparattyq-bilim berý salasyna elektrondy oqýlyqtardy engizý elektrondy bilim berý resýrstaryn paıdalaný sapasyn arttyrýǵa múmkindik beredi. Sonymen qatar, oqýshylar tek tyńdap ǵana qoımaı, berilgen tapsyrmalardy kórip, este saqtaý jáne oryndaý arqyly bilim sapasyn kóterýi tıis.
Bul baǵdarlama oqytý úrdisinde jańashyldyq sanalady. Vızýalızasııa arqyly sabaqtar qyzyqty, ózekti, zamanaýı bola tústi. «Sıfrlyq mektep» jobasyna toǵyz mektep qatysady. «Google-synyp» jobasy muǵalimderge AKT qoldanýdyń qazirgi zamanǵy ádistemelerin úıretip, Google qosymshalaryn sabaq josparlaý prosesinde ıntegrasııalaýǵa kómektesedi,. Sondaı-aq G Suite birlesken ádistemelik jumysyna, qaǵazsyz qujat aınalymyna, bilim berýge arnalǵan G Suite qosymshalary paketimen jumys isteýdiń praktıkalyq daǵdylaryn meńgerýge úıretedi. Qazirgi ýaqytta jobaǵa 1112 muǵalim men 1375 oqýshy qosylǵan.
Budan basqa, «E-portfolıo» ınnovasııalyq elektrondy platformasy jumys isteıdi. Oǵan qalanyń bilim berý uıymdarynyń barlyq pedagogtarynyń málimeti engen. Bul baza muǵalimderdi qaǵazbastylyqtan aryltýǵa, attestattaýdyń jańa formatyna sáıkes, pedagogtardy attestattaýdyń ekinshi kezeńin (jetistikter saraptamasy) sapaly jáne ashyq ótkizýge múmkindik beredi. Júıe portfolıony qolmen toltyrýdan bas tartýǵa jáne jetistikterdi avtomatty túrde bekitýge kóshýge jaǵdaı jasaıdy. Jańa platforma ustazdardy qaǵaz toltyrýdan bosatyp, óz qyzmetimen alańsyz aınalysýǵa múmkindik beredi.