Mádenıet jáne sport mınıstri Aqtoty Raıymqulova Ortalyq kommýnıkasııalar qyzmetinde ótken onlaın brıfıngte aýyl halqyn sportqa tartý úshin sporttyq nusqaýshylardyń sanyn ósirý kózdelgenin aıtty.
«Jalpy bilim berý mektepteriniń sport zaldarynda sporttyq seksııalardyń jumysyn uıymdastyryp, halyqtyń barlyq tobyna qoljetimdi etý maqsatynda óńirlik sport jáne bilim basqarmalarymen memorandýmǵa otyrý josparlanǵan. Sonymen qatar aýyl halqyn sportqa tartý, olarmen jumys isteý úshin sporttyq nusqaýshylardyń sanyn ósirý kózdelgen. Qazir olarǵa degen suranys 1000-nan asady», - dedi Aqtoty Raıymqulova.
Osy oraıda mınıstr aýyldyq jerlerde jańa jumys oryndaryn ashýǵa septigin tıgizetinin atap ótti.
«Jalpy bilim beretin mektepterdiń sporttyq zaldarynda balalarǵa arnalǵan sporttyq seksııalardyń jumysyn uıymdastyrý oılastyrylǵan. Búgingi tańda Mınıstrlikte 101 sporttyq federasııa akkredıttelgen. Olar qosymsha óz sport túrleri boıynsha 300 myń balany qamtıtyn 10 myń seksııa ashýǵa múmkindik alady. Mekteptik jáne stýdenttik lıgalardyń da sany artady. Bizdiń taǵy bir maqsat - sporttyq jeliler men ınfraqurylymdy arttyrý. Búginde elimizde 579 balalar-jasóspirimder klýby men balalar-jasóspirimderdiń dene daıarlyǵyna arnalǵan 107 klýb jumys isteıdi. Sáıkesinshe, olardyń sanyn 700-ge, tıisinshe 340-qa ósiremiz. Osylaısha dene shynyqtyrý men sportpen aınalysatyndardyń sany 100 myń adamǵa ósedi»,- dedi ol.