Premer-Mınıstr Asqar Mamın Semeı qalasyna jáne Shyǵys Qazaqstan oblysynyń Abaı aýdanyna jumys sapary aıasynda memlekettik baǵdarlamalardyń iske asyrylý barysyn jáne Abaıdyń 175 jyldyǵyn atap ótýge daıyndyqty tekserdi. Bul týraly Premer-Mınıstrdiń baspasóz qyzmeti habarlady.
Semeı qalasynda Úkimet basshysyna qalanyń 2020-2025 jyldarǵa arnalǵan áleýmettik-ekonomıkalyq damýynyń keshendi josparynyń, «Jumyspen qamtýdyń jol kartasy – 2020» jáne «Nurly jer» baǵdarlamalarynyń oryndalýy týraly baıandaldy. Atap aıtqanda, A. Mamın Abaı atyndaǵy alańdy, mýzeı men teatrdy rekonstrýksııalaý jumystarymen, sondaı-aq «Qaraǵaıly» shaǵyn aýdany men kópbeıindi mádenı-sport kesheniniń qurylysymen tanysty.
«Semeı táýelsiz Qazaqstannyń mádenı, rýhanı murasy men tarıhynda aıryqsha oryn alady. El basshylyǵy qalanyń áleýmettik-ekonomıkalyq damýyna jáne turǵyndardyń ómir súrý sapasyn arttyrýǵa erekshe kóńil bóledi», — dep A. Mamın, qalany damytý boıynsha barlyq josparlanǵan jobalardy ýaqytyly iske asyrýdy qamtamasyz etýdi tapsyrdy.
A. Mamın Abaı aýdanynyń ákimshilik ortalyǵy Qaraýyl aýylynda áleýmettik jáne ınjenerlik ınfraqurylymynyń damýyn tekserdi. Munda Úkimet basshysyna 300 orynǵa arnap salynyp jatqan orta mektep qurylysy, Abaı atyndaǵy saıabaqty salý, sondaı-aq eldi mekenniń sý tartý jelilerin rekonstrýksııalaý týraly baıandaldy.
Premer-Mınıstr Abaıdyń «Jıdebaı-Bórili» memlekettik tarıhı-mádenı jáne ádebı-memorıaldyq qoryq mýzeıine baryp, onda «Abaı-Shákárim» memorıaldyq keshenin restavrasııalaý jumystarynyń barysymen tanysyp, Abaıdyń mýzeı úıin aralady.
Úkimet basshysy Abaıdyń 175 jyldyǵyna oraı josparlanǵan Semeıdegi jáne Abaı aýdanyndaǵy tarıhı-mádenı nysandardy jóndeý jáne jańǵyrtý jumystaryn ýaqytyly ári sapaly aıaqtaýdy tapsyrdy.
«Mereıtoı memlekettik deńgeıde atalyp ótedi. Bul shara Qazaqstan halqy úshin úlken ıdeologııalyq jáne tarıhı mánge ıe», — dedi A. Mamın.