Senat Bıýrosynyń otyrysy barysynda elimizdiń Prezıdenti Q.K.Toqaevtyń Qazaqstan Respýblıkasy Joǵarǵy Sotynyń sýdıalaryn qyzmetten bosatý týraly usynymy, sondaı-aq Májilis maquldaǵan zań jobalaryn komıtetter arasynda bólý, Senattyń kezekti otyrysynyń kún tártibi boıynsha usynystar qaraldy. Odan basqa Negizgi is-sharalar josparyna ózgerister men tolyqtyrýlar engizildi. Bul týraly Parlament Senatynyń baspasóz qyzmeti habarlady.
Senat Tóraǵasy Máýlen Áshimbaev óz sózinde Joǵarǵy palatanyń negizgi maqsaty Memleket basshysynyń jańǵyrtý jónindegi alǵa qoıǵan mindetterin zańnamalyq turǵydan shuǵyl ári tıimdi qamtamasyz etý ekenin eske saldy. Soǵan oraı Senattyń jumys jospary sheńberinde aldaǵy kezeńge arnalǵan birqatar basym baǵyttar belgilendi. Olardyń qatarynda aýyldardy damytý, shaǵyn jáne orta bıznesti qoldaý, qoǵamda ulttyq qundylyqtardy keńinen dáripteý jáne basqa da baǵyttar bar.
«Josparda kórsetilgen baǵyttardy júzege asyrý úshin Parlamenttik tyńdaýlar, dóńgelek ústelder uıymdastyrylady. Parlament Májilisimen jáne Úkimetpen birlesip, zańdarǵa ýaqtyly ózgerister engizý jónindegi jumysymyzdy jalǵastyra beremiz. Osy jáne basqa da kóptegen máselelerdiń oń sheshimi halqymyzdyń ómir súrý deńgeıin arttyrýǵa múmkindik beredi dep senemin», – dedi Máýlen Áshimbaev.
Qazaqstan Respýblıkasy Prezıdentiniń «Qazaqstan Respýblıkasy Joǵarǵy Sotynyń sýdıalaryn qyzmetten bosatý týraly» usynysy kún tártibindegi birinshi másele boldy. Prezıdent usynǵan kandıdatýralar boıynsha qorytyndylar daıyndaý Konstıtýsııalyq zańnama, sot júıesi jáne quqyq qorǵaý organdary komıtetine tapsyryldy.
Qarjy jáne bıýdjet komıteti Eýrazııalyq ekonomıkalyq odaq pen Qytaı Halyq Respýblıkasynyń kedendik shekaralary arqyly ótkiziletin taýarlar men halyqaralyq tasymaldyń kólik quraldary jóninde aqparat almasý týraly kelisimdi ratıfıkasııalaý týraly zań jobasymen aınalysatyn boldy.
Halyq densaýlyǵy jáne densaýlyq saqtaý júıesi týraly kodeks jobasyna qorytyndy daıyndaý Áleýmettik-mádenı damý jáne ǵylym komıtetine tapsyryldy. Osy komıtetke sonymen qatar Qazaqstan Respýblıkasynyń keıbir zańnamalyq aktilerine densaýlyq saqtaý máseleleri boıynsha ózgerister men tolyqtyrýlar engizý týraly zań jobasy da berildi.
Konstıtýsııalyq zańnama, sot júıesi jáne quqyq qorǵaý organdary komıteti Qazaqstan Respýblıkasynyń Azamattyq prosestik kodeksine sottar jumysynyń zamanaýı formattaryn endirý, artyq sot rásimderi men shyǵyndaryn qysqartý máseleleri boıynsha túzetýler engizý jumystaryn bastaıdy.
Bıýro otyrysy barysynda Parlament Senatynyń 21 mamyrda ótetin otyrysynyń kún tártibi belgilendi.
Onda Senatorlar Joǵarǵy Sottyń sýdıalaryn qyzmetten bosatý týraly, Eýrazııalyq ekonomıkalyq odaqtyń kedendik aýmaǵyna ákelingen taýarlardy qadaǵalap otyrý tetigi týraly kelisimdi ratıfıkasııalaý týraly, «Qazaqstan Respýblıkasyndaǵy saılaý týraly» Qazaqstan Respýblıkasynyń Konstıtýsııalyq zańyna tolyqtyrýlar engizý týraly» Qazaqstan Respýblıkasy Konstıtýsııalyq zańynyń jobasyn, sondaı-aq, «Saıası partııalar týraly» Qazaqstan Respýblıkasynyń Zańyna ózgeris pen tolyqtyrýlar engizý týraly» jáne «Qazaqstan Respýblıkasynyń keıbir zańnamalyq aktilerine Qarýly Kúshterdiń, basqa da áskerler men áskerı quralymdardyń arsenaldary, bazalary men qoımalary janyndaǵy tyıym salynǵan aımaqtar men tyıym salynǵan aýdandar máseleleri boıynsha ózgerister men tolyqtyrýlar engizý týraly» zań jobalaryn qaraýdy josparlap otyr.