Atyraýdaǵy «Embimunaıgaz» AQ munaıshylary 3 265 metr tereńdikten munaı gorızontyn anyqtady.
Kásiporynnyń qoǵammen baılanys qyzmeti usynǵan aqparatqa súıensek, byltyrdan beri resýrstyq bazany ulǵaıtý jumystary jalǵasýda. Jaqynda munaıshylar S.Nurjanov ken ornynyń soltústik-batys bóliginde geologııalyq barlaýdy júrgizý barysynda tabysty nátıjelerge qol jetkizdi.
–Baıyrǵy ken oryndaryn ıgeretin kompanııanyń basym mindetteriniń biri –resýrstyq bazany ulǵaıtý. Osy baǵyttaǵy júıeli jumystardyń nátıjesinde S.Nurjanov ken ornyndaǵy burǵylanbaǵan bóliginiń trıas shógindilerinde 3252-3265 metr tereńdikte jańa ónimdi gorızont anyqtaldy. NSV-11 baǵalaý uńǵymasyn burǵylaý qorytyndysymen 9 mm shtýserde táýligine 165 tekshe metr debıtpen sýsyz munaı burqaǵy alyndy. Mundaǵy munaıdyń úles salmaǵy – 0,836 g/sm3, al, gaz faktory – 105 m3/m3. Qazirgi ýaqytta munda uńǵyma jumysynyń ońtaıly rejımin anyqtaý maqsatynda kásipshilik-geologııalyq jáne gıdrodınamıkalyq zertteýler keshenin júrgizý arqyly synaq jalǵasýda, - deıdi «Embimunaıgaz» AQ basqarma tóraǵasy Esen Qaıyrjan.