«Januıa» otbasy ınstıtýtyn qoldaý ortalyǵy ótken jyldyń tamyz aıynda ashyldy. Qysqa merzim ishinde ortalyq zańger, psıhologtyń kásibı keńesin qajet etetinderge, áleýmettik kómekti, jańa mamandyqty qalaı alýǵa bolatynyn bilmeıtinder úshin taptyrmas kómekshige aınaldy, dep habarlady elorda ákimdiginiń baspasóz qyzmeti habarlady.
Ortalyq turǵyndarǵa «bir tereze» qaǵıdasy boıynsha 70-ten astam memlekettik qyzmet kórsetedi. Karantın kezinde ortalyq onlaın rejıminde kómek kórsete otyryp, óz jumysyn toqtatqan joq. Qazir «Januıa» shtattyq rejımde jumys isteıdi.
«Biz ortalyq jumysyn qalpyna keltirdik. TJ kezinde qala turǵyndaryna koll-ortalyq arqyly qyzmet kórsettik. Osy kezeńde bizge 5 myńǵa jýyq adam ótinish bildirip, barlyǵyna qajetti keńes berildi», – deıdi Nur-Sultan qalalyq eńbek jáne halyqty áleýmettik qorǵaý basqarmasy basshysynyń orynbasary Aıgerim Táńirbergenova.
Ashylǵan sátten bastap munda 27 myń másele boıynsha 12,7 myńnan astam azamat júgindi. Onyń ishinde 20 myń másele qaraldy, ıaǵnı konsýltasııalyq qadamdyq kómek kórsetildi, 7 myńy boıynsha tıisti sharalar qabyldandy.
Sonymen qatar «Januıada» onlaın rejımde kóp balaly áıelder, múgedek balalardy tárbıelep otyrǵan áıelder, tolyq emes otbasylar úshin «Kásipker ana» oqytý kýrstary ótýde.
«Osy joba aıasynda dızaıner, kopıraıter, SMM mamany jáne basqa da qajetti mamandyqtarǵa oqýǵa bolady. Joba arqyly bes júzden astam áıel oqytyldy. Olardyń 70-i úıde nemese óziniń shaǵyn isin ashty. Meniń oıymsha, bul jetistik», – deıdi A.Táńirbergenova.