Memleket basshysy Qasym-Jomart Toqaevtyń atyna Túrkııa Prezıdenti Rejep Taııp Erdoǵannyń joldaý haty kelip tústi. Qujatta elimizdiń jańa koronavırýsqa qarsy qabyldap jatqan keshendi is-áreketterine joǵary baǵa berildi. Bul týraly Aqordanyń baspasóz qyzmeti habarlady.
– Qazaqstanda COVID-19 indetine qarsy qabyldanyp jatqan tıimdi sharalar men jumystaryńyzdy muqııat qadaǵalap otyrmyz. Eń aldymen, indetpen kúreste alǵy sheptegi medısına qyzmetkerleriniń jumysyna tabys tileımin. Qazaq halqy bul daǵdarysty az shyǵynmen eńseretinine senimim mol. Osy oraıda, dostas ári baýyrlas Qazaqstanǵa qol ushyn sozýǵa árdaıym daıynbyz. Qazaqstandyq dostarymyzdyń kúsh-jigerine qoldaý bolar degen nıetpen elińizge medısınalyq jabdyqtar jiberýdemin, – delingen hatta.
Túrkııa Prezıdenti koronavırýs pandemııasy saldarynan qaıtys bolǵan Qazaqstan azamattarynyń otbasylaryna kóńil aıtyp, qaýipti aýrý juqtyrǵandardyń tezirek saýyǵýyna tilektestigin jetkizdi.
Sondaı-aq, Rejep Taııp Erdoǵan ortaq tarıh pen baýyrlastyqtan bastaý alatyn ekijaqty strategııalyq áriptestik qazirgi daǵdarystan keıin ári qaraı bekı túsetinine senimdi.