Qarqaraly qalasyndaǵy tarıhı-ólketaný mýzeıine kelýshilerdiń kózaıymyna aınalǵan jádigerdiń biri – qas sheberdiń qolynan shyqqan ertoqym.
Zamanynda qymbat dúnıeniń birinen sanalǵan bul buıymnyń tarıhy tereńde. Ertoqymdy 1916 jyly on alty jasynda uzatylyp bara jatqan qyzy Bıbisaraǵa arnap ákesi Begáli soqtyrypty. Begáliniń óz ákesi Jumanbaı degen kisi Sherýbaı-Nura ózeniniń boıyn jaılaǵan baı bolǵan. Zamanynda eki myńǵa tarta jylqy aıdaǵan eken.
Al ertoqymdy Begáli baı Nurqabden Dúısenqulov degen sheberge birneshe qylquıryqtyń qunyna jasatqan eken.
Aýyl qarııalarynyń aıtýy boıynsha, Bıbisara arý ózine atastyrǵan baıdyń balasyn taz dep mensinbegen soń, sóz baılasyp júrgen jigiti Irgebaı Joldın kelip alyp qashyp ketipti. Keıin ekeýi turmys quryp, úıli-barandy bolǵan eken.
Arshadan tutas shabylǵan ertoqym kıizben qaptalyp, kúmispen aptalyp, kózdiń jaýyn alarlyqtaı sulýlyqta jasalǵan. Kezinde qymbat asyl tastarmen kómkerilgen eken, keıin onysy qoldy bolypty.
«Kúmis erdi murajaıǵa 1976 jyly Bıbisara Begáliqyzynyń Máken esimdi qyzynan týǵan Samat Ahmetbekuly degen azamat tapsyrǵan», deıdi Qarqaraly tarıhı-ólketaný mýzeıiniń basshysy Nazym Ábisheva.
Qaraǵandy oblysy,
Qarqaraly aýdany