«Azamattardyń memlekettik qyzmetke ornalasý úderisin jeńildetý úshin jáne konkýrstardy barynsha ashyq ótkizý úshin agenttiktiń bastamasymen «Memlekettik qyzmetke ornalasý erejelerine» ózgerister engizildi.
Birinshiden, qoldanystaǵy erejeler boıynsha úmitkerler baıqaýlarǵa qajettilik boıynsha úıden shyqpaı-aq qatysa alady. Ol úshin qujattardy elektrondy poshta arqyly tapsyrýǵa múmkindik berildi, ıaǵnı buryn talap etilgendeı, memlekettik organǵa qujattardyń qaǵaz nusqalaryn ákelý qajettiligi joıyldy. Sonymen qatar áńgimelesýden ótý úshin kandıdattyń memlekettik organǵa kelýi qajet emes. Osylaısha túzetýlerge sáıkes áńgimelesý qashyqtan beıne baılanys quraldary arqyly júrgizilýi múmkin.
Ekinshiden, buryn memlekettik qyzmetke ornalasý boıynsha konkýrsqa qatysý úshin úmitkerler konkýrs qorytyndysyna qaramastan tolyq qujattar tizimin daıyndaý qajet bolatyn. Endi konkýrsqa qatysý úshin úmitkerler óz ótinishine tek eki qujatty: dıplomnyń kóshirmesin jáne qyzmettik tizimniń kóshirmesin qosa usynady. Qalǵan talap etiletin qujattardy konkýrstyq komıssııanyń oń sheshimin alǵan kandıdat qana tapsyrady.
Úshinshiden, agenttik konkýrstyq rásimderdiń ashyqtyǵyn odan ári arttyrýǵa baǵyttalǵan túzetýler qabyldady. Osylaısha sońǵy túzetýlerge sáıkes, konkýrsqa qatysa alatyn áleýetti baqylaýshylar qatary barynsha keńeıtildi. Buǵan deıin baqylaýshylar tobyna depýtattar, BAQ, qoǵamdyq birlestikterdiń, saıası partııalardyń ókilderi, agenttik jáne ózge de memlekettik organdardyń qyzmetkerleri kirgen-di. Endi árbir kámelet jasqa tolǵan, áreketke qabiletti azamat baqylaýshy bola alady. Bul úmitkerlerge konkýrstyq komıssııanyń hatshysyn aldyn ala habardar ete otyryp, óziniń baıqaýshysyn áńgimelesýge shaqyrýǵa múmkindik beredi.
Tórtinshiden, buryn Komıssııa sheshimi daýys berý jolymen qabyldanatyn. Máselen, komıssııanyń keıbir músheleri konkýrstyq komıssııa músheleriniń baǵalaýy boıynsha basqa kandıdattardan az ball jınaǵan kandıdatqa daýys bere alatyn. Sońǵy túzetýlerge sáıkes, komıssııa músheleri daýys berý arqyly laýazymǵa kandıdatty tańdamaıdy. Konkýrstyq komıssııanyń sheshimi boıynsha bos laýazymǵa eń kóp ball jınaǵan kandıdat ıe bola alady. Bul rette, upaılar úmitkerdiń jaýaptarynyń durystyǵy men tolyqtyǵyn, onyń essesiniń baǵasyn, onyń tájirıbesin, bilimi men kommýnıkatıvtik daǵdylaryn, laýazymnyń ereksheligine baılanysty qoıylatyn krıterıılerdi eskere otyryp qoıylady.
Besinshiden, áńgimelesý konkýrs jeńimpazyn tańdaý kezinde jalǵyz ólshem bolyp tabylmaıdy. Sonymen konkýrsqa deıin úmitkerler memlekettik tildi jáne zańnamany bilýge testileýden, sondaı-aq jeke qasıetterin baǵalaýdan ótedi. Al «B» korpýsynyń basshy laýazymyna kandıdattar (basqarma basshysy laýazymynan jáne odan joǵary) budan bólek esse tapsyrady. Sondaı-aq konkýrstyq komıssııanyń múshelerine laýazymnyń ereksheligine baılanysty tıisti jumys daǵdylary men quzyrettiligi bar eń úzdik kandıdatty tańdaý úshin qosymsha irikteý quraldaryn qoldaný quqyǵy berilgen. Mysaly, konkýrstyq komıssııa úmitkerlerden tıisti saladaǵy problemalar men olardy sheshý múmkindikteri boıynsha prezentasııa jasaýdy, keıstik nemese praktıkalyq tapsyrmalardy sheshýdi jáne taǵy basqa suraq qoıa alady.
Anar JAIYLǴANOVA,
Qazaqstan Respýblıkasy Memlekettik qyzmet isteri agenttiginiń tóraǵasy