Túrkistan oblysy, Maqtaaral aýdanyna Atyraý oblysynan 12 mln teńge kólemindegi 20 tonna balyq pen gýmanıtarlyq kómek kelip jetti.
Atyraý oblysynyń ákimi, Nur Otan partııasy oblystyq fılıalynyń tóraǵasy Mahambet Dosmuhambetovtyń qoldaýymen júzege asyrylǵan kómekti jiberý jónindegi sheshim «Damby» bastaýysh partııa uıymynyń «nurotandyq» balyqshylary jalpy jınalysynda qabyldanǵan eken. Atyraýlyq balyqshylardyń amanaty Myrzashól óńirine jetkizilip, ortalyq qoımaǵa qabyldanyp alyndy. Sonymen birge, «Transservıs Aqjol» kompanııasy atynan azyq-túlik pen kıim-keshek jetkizildi. Júk kerýenin bastap kelgen osy kompanııanyń dırektory О́tegen Aınabekov atyraýlyq azamattar arasynda kómektesýge nıettiler óte kóp bolǵanyn aıtady.
Balyq demekshi, Sardoba sý qoımasynan Maqtaaral aýdany aýmaǵyna aǵyp kelgen topan sýdaǵy balyqtar jeýge jaramsyz ekeni anyqtaldy. Aýyl sharýashylyǵy mınıstrligi veterınarııalyq baqylaý jáne qadaǵalaý komıtetiniń «Respýblıkalyq veterınarııalyq zerthanasy» mamandary osyndaı qorytyndyǵa kelip otyr. Zerthana mamandarynyń aıtýynsha, topan sýdaǵy balyqtardyń ishki aǵzalarynan bakterııalardyń birneshe túri bar ekeni anyqtalǵan. Osyǵan oraı Túrkistan oblystyq orman sharýashylyǵy jáne janýarlar dúnıesi aýmaqtyq ınspeksııasy sarqyndy sýlardaǵy balyqtardy aýlap, kózin joıý jumystaryn bastap ketti. Sondaı-aq, halyq arasynda sarqyndy sýdaǵy balyqtardy aýlaýǵa, tutynýǵa bolmaıtyny jóninde nasıhat jumystary jalǵasýda.
Túrkistan oblysy