Qazaqstanǵa kele jatyr
Dúnıejúzilik fýtbol dodasynyń eń basty júldesiniń Qazaqstanǵa at basyn tireýine “Coca Cola” kompanııasy yqpal etip otyr. О́ıtkeni, bul kompanııa sonaý 1950 jyldan bastap álemdik teńbil dop dodalarynda jarnama jasap qana qoımaı, áýesqoı fýtboldan bastap barlyq deńgeıde ótetin jarystardyń basty demeýshisi bolyp tabyldy.
Atalmysh kompanııa uıymdastyryp otyrǵan aıtýly shara bizdiń elimizden de bólek, 9 aı boıy 225 táýliktiń ishinde álemniń 86 eliniń 89 qalasynda ótpek. FIFA Álem Kýbogynyń tarıhtaǵy eń iri saparynyń uzaqtyǵy 134 017 shaqyrymǵa sozylatyn bolady. Bul – Jer sharyn úsh ret aınalyp shyǵýǵa bolatyn qashyqtyq.
Som altynnan quıylǵan Kýboktyń bıiktigi 36,8 santımetr, jalpy salmaǵy 6 kılo 175 g. Qazaqstanǵa kele jatqan Kýbok onyń jasandy kóshirmesi emes, dáp ózi.
Mine, osyndaı naǵyz bas júldeniń eń iri tarıhı sapary ótken jyldyń qyrkúıeginde FIFA-nyń shtab-páterinen bastalǵan-dy. Álem Kýbogy joǵaryda atap ótkendeı, 86 memleketti kezegimen aralap, ústimizdegi jyldyń 4 mamyrynda chempıonat ótetin Ońtústik Afrıkaǵa taban tireıdi.
Aıtqandaı, Kýboktyń saıahaty shtab-páterden bastap, búkil baǵyt boıymen dittegen jerine jetkenshe asa joǵary qaýipsizdik sharalarymen qamtamasyz etilýde, óıtkeni, tarıhta áıgili trofeıdi urlaýǵa eki ret áreket jasalǵany belgili.
Dástúrli týr FIFA jáne FIFA-nyń eń baıyrǵy seriktesiniń biri “Coca Cola” kompanııasymen erekshe yntymaqtastyqta júzege asyp otyr. Bul týr 2006 jyly ótkizilgen alǵashqy álemdik sapardyń jalǵasy, ol kezde Kýbok 29 eldiń 31 qalasyna at basyn tirep, 102 570 shaqyrym joldy júrip ótip, fýtboldyń mıllıondaǵan jankúıeri álemniń eń tanymal júldesin jaqynnan tamashalaýǵa múmkindik alǵan-dy.
Al qazirge Qazaqstanǵa tıesili oqıǵalar legi mynadaı. Naýryzdyń ortasynda FIFA Álem Kýbogy bizdiń elge kele jatqany týraly alǵashqy baspasóz máslıhaty ótse, sáýirdiń 2-si kúni Almatydaǵy Abaı dańǵylyndaǵy Ortalyq stadıonǵa kire beriste arnaıy tablonyń tusaýkeser rásimi bolyp ótti. Bul keri esepteý tablosy Kýboktyń Qazaqstanǵa kelýine qansha kún qalǵanyn áıgilep tur.
Atalmysh kompanııa Kýboktyń Qazaqstanǵa saparyna oraı, astanalyq “Lokomotıv” fýtbol klýbynyń shabýylshysy ári Qazaqstan ulttyq quramasynyń múshesi Sergeı Hıjnıchenkony erikti elshi retinde tańdaǵan.
Sonymen, FIFA Álem Kýbogynyń túpnusqasy kezekti ret alda Ońtústik Afrıkanyń Iohannesbýrg qalasyndaǵy “Soccer City” stadıonynda ótken dodada jeńip shyqqan eldiń quramasyna tapsyrylady. Jeńimpazdar keıingi jarysqa deıin ony ózderinde saqtaıdy jáne marapatqa taza altynnan jasalǵan kýbokty emes, onyń juqa altynnan jasalǵan kóshirmesin alady.
Tabanyna eki qabat malahıt salynǵan trofeıdiń túbine 1974 jyldan beri fýtboldan Álem Kýbogyna ıe bolǵan elderdiń attary men jyldary oıyp jazylǵan. Al bıyl aqtyq synǵa joldama alǵan 32 komanda tuńǵysh ret Afrıka qurlyǵynda bas trofeı úshin barlaryn salatyn bolady. Olardyń qaısysynyń aty Kýboktyń tabanyna maqtanyshpen qashalatynyn aldaǵy ýaqyt kórsetedi.
Aınash ESALI.
ALMATY.