Erulan Jamaýbaev Qasym-Jomart Toqaevqa Qarjy mınıstrliginiń negizgi jumystary týraly esep berdi. Bul týraly Aqordanyń baspasóz qyzmeti habarlady.
Atap aıtqanda Qazaqstan Prezıdentine respýblıkalyq bıýdjettiń oryndalýy men josparlanýy, memlekettik satyp alýlar men qazynashylyq qyzmet kórsetý isiniń júzege asyrylýy, memlekettik aýdıt júrgizý, memlekettik aktıvterdi basqarý, salyq jáne keden salalaryn ákimshilendirý, sondaı-aq, qarjylyq quqyq buzýshylyqtardy anyqtaý jaıynda baıandaldy.
Memleket basshysy kóleńkeli ekonomıkaǵa qarsy kúres, salyq kólemin ósirý, bıýdjettik rásimderdi ońtaılandyrý, kórsetiletin memlekettik qyzmet túrleriniń sapasyn arttyrý jáne qaryzdyq shekteýlerdi saqtaý baǵytynda júıeli jumys júrgizý qajettigin aıtty.
Kezdesý sońynda Qasym-Jomart Toqaev salyq jáne keden salalaryn ákimshilendirý, memlekettik satyp alý jáne bıýdjet úderisine qatysty zańnamalardy jetildirý máseleleri boıynsha birqatar naqty tapsyrma berdi.