Taraptar qazaq-ıran qatynastarynyń qazirgi ahýaly men damý perspektıvalaryn, sonyń ishinde saýda-ekonomıkalyq yntymaqtastyqty nyǵaıtý máselelerin talqylady. Bul týraly Aqordanyń baspasóz qyzmeti habarlady.
Hasan Rýhanı Iran tarapynyń Qazaqstanmen taýar aınalymyn arttyrýǵa múddeli ekenin atap ótip, «Qazaqstan-Túrikmenstan-Iran» temir jolynyń, sondaı-aq, Kaspıı teńizi arqyly ótetin mýltımodaldi dálizderdiń áleýetin tıimdi paıdalanýdyń ózektiligine toqtaldy.
Osy oraıda Iran tarapy júk tasymalyn ulǵaıtý maqsatynda atalǵan kólik baǵyttarynyń básekege qabilettiligin arttyrý úshin birlesken jumystardyń mańyzdy ekenin jetkizdi.
Qasym-Jomart Toqaev ekijaqty ekonomıkalyq baılanystardy jandandyrýdyń naqty sharalaryn úkimetter deńgeıinde ázirleýdi usyndy.
Memleketterdiń COVID-19 indetine qarsy kúreske qatysty qabyldaǵan sharalaryna erekshe nazar aýdaryldy.
Iran Prezıdenti indettiń taralýyn boldyrmaý jónindegi Qazaqstan basshylyǵynyń qabyldaǵan sheshimderi men atqarǵan is-qımyldaryn, sondaı-aq, halyq arasynda keń aýqymda júrgizilgen koronavırýsty anyqtaý jumystaryn joǵary baǵalady.
Áńgime sońynda Hasan Rýhanı Qasym-Jomart Toqaevty Tegeranǵa resmı saparmen kelýge shaqyrdy.