Densaýlyq saqtaý mınıstri Eljan Birtanov Almaty qalasyndaǵy jańadan salynǵan modýldik juqpaly aýrýlar aýrýhanasyna bardy, dep habarlady mınıstrliktiń Facebook-tegi resmı paraqshasy.
18 kúnde salynǵan aýrýhanada 280 tósek-oryn, 6 klınıkalyq bólimshe, 28 tósektik reanımasııa bólimshesi bar. Sonymen qatar gospıtal rentgen júıesi, kompıýterlik tomografııa, ýltradybystyq dıagnostıka apparattary, endoskopııalyq jabdyqtar, ókpeni jasandy jeldetý apparattary, monıtorlar, perfýzorlar sııaqty apparattarmen jabdyqtalǵan. Jańa aýrýhanaǵa 26 sáýirden bastap koronovırýs ınfeksııasyn juqtyrǵan naýqastar jatqyzyldy. Qazir COVID-19 dıagnozy qoıylǵan 251 pasıent emdelýde.
Eljan Birtanov modýldik keshende ornalasqan «I.S.Jekenov atyndaǵy qalalyq klınıkalyq juqpaly aýrýlar aýrýhanasy» fılıalynda eńbek etip jatqan dárigerlermen júzdesti jáne naýqastardyń da jaǵdaıyn surady. «Gospıtalda jaqsy jaǵdaı jasalǵan, emdelýdemiz. Medısına qyzmetkerleri óte muqııat, árdaıym sózimizdi jerge tastamaıdy jáne qıyn kezde úlken qoldaý kórsetti», dedi Anastasııa Zaharova (aty-jóni ózgertildi).
Sondaı-aq mınıstr Almatyǵa bir kúndik issapary aıasynda birqatar medısına mekemesin de aralap, kezdesýler ótkizbek. Atap aıtqanda sanıtarlyq-epıdemıologııalyq saraptama jáne monıtorıng ǵylymı-praktıkalyq ortalyǵyna, S.Asfendııarov atyndaǵy QazUMÝ men farmasevtıka zaýytyna, óndiris sehyna barady jáne ondaǵy bakterıolog, ımmýnolog jáne genetık ǵalymdarmen kezdesip, COVID-19-dy talqylaıdy.