Keshe Petropavldyń Chaıkovskıı kóshesinen Astana dańǵylyna qaraı burylǵan kezde «Daimler» kóligi jaıaý júrginshige baǵdarsham talabyna sáıkes jol bermeı, soǵyp ketken. Alǵashqyda talyp qalǵan qalanyń 23 jastaǵy turǵyny aýrýhanaǵa jetkizilgen soń esin jınap, medısınalyq tekseristen ótken soń úıine jiberildi.
Jaıaý júrginshige jol bermegen júrgizýshige qatysty JKO faktisi boıynsha ÁQtK 600-baby boıynsha hattama toltyryldy. Jol tártibin buzǵandyǵy dáleldense ony kem degende júrgizýshilik kýáliginen aırylý jazasy kútip tur.
Dál osy kúni, sol Chaıkovskıı kóshesinen Jambyl dańǵylyna burylǵan «Toıota» avtokóliginiń júrgizýshisi baǵdarshamnyń ruqsat berilgen jaryǵynda ótip bara jatqan eki áıel men úsh jastaǵy qyzdy soqqan. Zardap shegýshiler medısınalyq mekemelerge jetkizilip, kómek kórsetilgennen keıin úılerine qaıtaryldy. Qazirgi ýaqytta sot-medısınalyq saraptamasy taǵaıyndaldy. Onyń nátıjeleri boıynsha ákimshilik polısııa JKO faktisi týraly jınaqtalǵan materıaldardy sotqa joldaıdy. 30 jastaǵy júrgizýshi sáýir aıynda ǵana jol-kólik oqıǵasyn jasaǵany úshin alty aıǵa kólik júrgizý quqyǵynan aıyrylǵan eken. Soǵan qaramaı rólge otyrǵan.
Osy oqıǵalardy kezdeısoqtyq dep aıta almaısyń. Petropavl shaǵyn qala, ony saǵatyna 50 shaqyrymdyq jyldamdyqpen-aq bir saǵatta eki aınalyp shyǵýǵa bolady. Kólik keptelisi de joq. Biraq soǵan qaramaı kólikterin barynsha jyldam júrgizýge, tipti jarysa ketýge daıyn júretin júrgizýshiler óte kóp. Aldynda júz metrdeı ǵana ashyq alań paıda bolsa sol qashyqtyqtyqty 100 shaqyrymdyq jyldamdyqpen alǵysy kelýge tyrysatyndar bar. Osynyń ózinen kóptegen júrgizýshilerdiń mádenıeti tómendigi, qala tártibin moıyndaǵysy kelmeıtindigi kórinip tur. Jazalaý qatty bolǵan saıyn qutyratyndar da bar sııaqty. Joǵarydaǵy júrgizýshi tipti kýáligi bolmasa da rólge otyra bergen. Mundaılardyń kýáligin ǵana emes, kóligin de alyp qoıý kerek shyǵar.