Bolgarııanyń Albena qalasynda búgin, qyrkúıektiń 28-i kúni túnde márege jetken bokstan jasóspirimder arasyndaǵy álem chempıonatynyń fınaldyq aıqasynda óner kórsetken qazaqstandyq 5 balǵyn boksshy túgeldeı jeńiliske ushyrady. Bul týraly Egemennews.kz tilshisi habarlady.
Sonymen, Nazerke Jurǵabaeva (46 kg) – amerıkalyq Kaıtın Oroskodan (1:2),
Asyl Asqarova (48 kg) - reseılik Ekaterına Palsevadan (0:3), Balaýsa Muzdyman (54 kg) – ýkraın Anjelına Bondarenkoden (1:2), Lıýbov Hasıeva (66 kg) – orys Svetlana Hodarevskaıadan (0:3), al Aqmaral Shamshıdenova (80 kg) reseılik Vlada Kalachevamen (0:3) utylyp qaldy. Sóıtip, bulardyń bári kúmis medaldy qanaǵat tutty.
Munyń aldynda Aıgerim Oshaqbaı (52 kg), Nazym Ishanova (57 kg), Ekaterına Anısımova (60 kg), Aıda Ábikeeva (63 kg), Baıan Aqbaeva (70 kg), Altyn Muqyshbekova (75 kg) qola medalge ıe boldy.
Osylaısha jartylaı fınalda 11 (!) birdeı boksshysy kúsh synasqan Qazaqstan quramasy sońynda birde-bir altyn medalge ıe bola almaı, qatty uıatqa qaldy.
Komandalyq birinshi oryndy 4 altyn medal oljalaǵan Reseı qyzdary alyp ketti. Ekinshi orynǵa 2 altyn medalmen AQSh quramasy kóterildi. Bulardan basqa, Qytaı, Italııa, Ýkraına, Irlandııa, Polsha, Túrkııa jáne Taıpeı komandalarynda bir-birden altyn júlde bar.
Damır Qojamqul.