Bolgarııanyń Albena qalasynda keshe, 28 qyrkúıek kúni túnde márege jetken jastar (1995-1996 jj.) arasyndaǵy álem chempıonatynda qazaqstandyqtar 1 altyn, 1 kúmis jáne 3 qola medal jeńip aldy. Bul týraly Egemennews.kz tilshisi habarlady.
Bizdiń qyzdar arasynda 69 kıloǵa deıingi salmaqta óner kórsetken Gaýhar Ermekbaı chempıon atandy. Bolgarııa rınginde 4 urys ótkizgen ol týrnırdi 1/8 fınaldan bastap, ıtalıan Domızıana Gıýlıanellıdi talassyz (3:0) jeńdi. Al shırek fınalda orys qyzy Anna Bobyrevany 2:1 esebimen tize búktirdi. Jartylaı fınalda oǵan amerıkalyq Samanta Kınchen qarsy tura almady – 3:0! Sosyn altyn medal úshin talasta ırland Krıstıne Desmondtan bas báıgeni tartyp áketti – 2:1.
Birinshilikte 60 kıloǵa deıingi salmaqta elimizdiń namysyn qorǵaǵan Aıdana Arapbaeva aqtyq aıqasta polıak Agneta Rýgıelskaǵa 0:3 esebimen jol berip aldy. Al qola medaldy Alýa Balqybekova (48 kg), Valentına Halzova(75 kg) jáne Anastasııa Rylına (81 kg) esimdi qyzdarymyz qanjyǵaǵa baılady.
Jalpy, chempıonatta polıak qyzdary – 2, al Bolgarııa, Taıpeı, Qytaı, Shvesııa, Qazaqstan, AQSh, Vengrııa jáne Reseı komandalary bir-birden chempıon shyǵardy. Komandalyq birinshi oryn osyǵan oraı 2 altyn, 1 kúmis medali bar Polsha quramasyna buıyrdy. Ekinshi orynǵa 1 altyn, 2 kúmis medalmen Qytaı qyzdary shyqty. Bizdiń jasaq úshinshi orynǵa turaqtady.
Damır Qojamqul.