Búgin, 29 qyrkúıek kúni elimizdiń 6 qalasynda Premer-lıga komandalary arasynda 28-týrdyń oıyndary oınaldy.
Týrda 1-6 oryndar úshin talasýshylar arasynda alǵashqy úsh oryndy alyp kele jatqan komandalar túgel jeńiske jetti. Atap aıtqanda, birinshi oryndaǵy «Aqtóbe» Almatyda oınaǵanyna qaramastan, jergilikti «Qaırattan» 1:0 esebimen basym tústi. Ras, machtyń birinshi bóligi negizinen alań ıeleriniń basymdylyǵymen ótti. Degenmen, qonaqtardyń bul ýaqyt aralyǵynda da gol soǵyp, alǵa shyǵýǵa zor múmkindigi boldy. Olardyń qaqpaǵa qaraı urǵan eki dobynyń nátıjeli aıaıaqtalýyna sál ǵana dáldik jetpeı qalǵanyn aıatpaǵanda, bir ret tipti on bir metrlik aıyp dobyn da paıdalana almady. Durysy, Aleksandr Genrıh urǵan penaltı darbaza aýmaǵyna týralap ta barǵan joq. Munyń esesine, aqtóbelikter ekinshi taımda birshama belsendi oınady. Biraq olar oıyndaǵy jalǵyz goldy alǵashqy 90 mınýtta emes, oǵan qosylǵan birinshi mınýtta soqty.
Shymkentte «Ordabasy » týrnır kestesinde ekinshi bolyp kele jatqan «Astanany» qabyldap, 0:2 bolyp utyldy. Osymen shymdy shahardyń shandozdary qatarynan úshinshi márte jeńilip otyr. Al kesteniń úshinshi satysynda turǵan Pavlodardyń «Ertisi» óziniń izin basyp kele jatqan «Shahtermen» oıynda jeńisti eń sońǵy mınýttarda tartyp áketti. Onda tipti qonaqtar birinshi bolyp esep ashty. Degenmen, kóp uzamaı alańdaǵy jaǵdaıdy teńestirgen alań ıeleri oıyndy jeńiske deıip aparyp aıaqtady.
Endi oıyndardyń nátıjelerimen tanys bolyńyzdar:
«Vostok» (О́skemen) – «Aqjaıyq» (Oral) 2:0
Goldar: Erbes (36), Kostıýk (79, penaltı)
«Ordabasy» (Shymkent) – «Astana» (Astana) 0:2
Goldar: Qonysbaev (8), Tvýması (75)
«Qaırat» (Almaty) – «Aqtóbe» (Aqtóbe) 0:1
Gol: Badlo (90+1)
«Ertis» (Pavlodar) – «Shahter» (Qaraǵandy) 2:1
Goldar: Chısýlın (78), Mýrzoev (88) – Jolshorın (70)
«Taraz» (Taraz) – «Jetisý» (Taldyqorǵan) 0:1
Gol: Tileshov (3)
«Atyraý» (Atyraý) – «Tobyl» (Qostanaı) 0:0
Kelesi týrdyń oıyndary 5 qazan kúni oınalady. Bul eki ortada, 2 qazan kúni Qaraǵandynyń «Shahteri» Astanada Eýropa lıgasy toptyq oıyndarynyń 2-týrynda Izraıldiń Haıfa qalasynyń «Makkabı» komandasyn qabyldaıdy.
Rýslan Igilik.